Një ditë më parë u konstitua Kuvendi i Kosovës, ndërsa sot pritet që presidenti Hashim Thaçi të mandatojë si Kryeministër Albin Kurtin, për të formuar qeverinë e re, pas zgjedhjeve të tetorit.
Pritet që sot në orën 11:00 Thaçi të mandatojë, Albin Kurtin, kreun e Lëvizjes Vetëvendosje për kryeministër, por ky i fundit nuk i ka votat për të formuar qeverinë e re.
Për negociatat me Lëvizjen Vetëvendosje, kreu i LDK-në Isa Mustafa është shprehur për këtë çështje se ende ka hapësirë për marrëveshje. Mesditën e djeshme, kreu i LDK-së, Isa Mustafa i ka bëri ofertë të fundit Albin Kurtit, ku kërkoi pesë ministri nga kabineti dhe presidentin.
Më pas Mustafa, iu përgjigj video-mesazhit të Albin Kurti, i cili shprehej optimist se nesër Kosova mund të kishte qeverinë e re.
Mustafa deklaroi është gati për t’u ulur sërish me Vetëvendosjen në tavolinë e të nënshkruajnë marrëveshjen, pasi për të negociatat nuk kanë dështuar.
Mes këtyre dy partive, Lëvizjes Vetëvendosje dhe Lidhjes Demokratike të Kosovës vijojnë negociatat, por ende nuk është gjetur gjuha e përbashkët. Nuk dihet ende se çfarë do ndodhë në vijim.
Vetëvendosje ka 29 deputetë në Kuvend, LDK 28, Partia Demokratike e Kosovës 24, koalicioni Aleanca për Ardhmërinë e Kosovës dhe Partia Socialdemokrate kanë 13 vende dhe koalicioni NISMA-AKR-PD ka 6 vende. Lista Serbe ka fituar 10 vende aq sa i takojnë komunitetit serb.
Negociatat deri më sot kanë dështuar, pasi LDK ka kërkuar që të marrë kreun e Kuvendit, Presidentin dhe pesë ministri, pra gjysmën e kabinetit. Por sot, LDK tha se heq dorë nga kreu i Kuvendit, duke ofruar një marrëveshje të palëkundur për pesë ministri dhe presidentin.
