Presidenti i Kosovës ka mbërritur pasditen e sotme në aeroportin e Rinasit nga ku është drejtuar menjëherë për në Kosovë. Ashtu siç u paralajmërua edhe nga djali i tij, Thaçi është pritur nga simpatizantë të shumtë në pikën kufitare të Morinës. Siç shihet dhe nga videot e siguruara nga Faxneës presidenti është pritur me flamur kuq e zi si dhe me flamurët e UÇK-së.
Presidenti i Kosovës, Hashim Thaçi, gjatë ditës së djeshme ka përfunduar intervistimin në Gjykatën Speciale në Hagë, intervistimi i tij ka zgjatur katër ditë. Presidenti Thaçi, pas përfundimit të intervistimit ka thënë se për katër ditë ka dhënë dëshmitë e tij lidhur me aktivitetet që ka bërë gjatë periudhës së luftës.
“Sapo përfundova dëshmin time para prokurorit të dhomave të specializuara. Më vjen shumë mirë që për katër ditë kisha mundësinë të jap dëshmitë për të gjitha çështjet që lidhen me aktivitetin tim gjatë periudhës së luftës, dhe përpjekjet e mija për paqe, stabilitet, zhvillim dhe progres.
Gjatë këtyre katër ditëve, jam mundur të jap informacione për rolin tim, përgjegjësitë e mija gjatë luftës. Gjatë tërë kësaj periudhe kam qenë i shoqëruar nga avokati, përkundër faktit që dëshmia ime ka zgjatur shumë, kemi pasur seanca produktive, tani i mbetet prokurorit dhe gjykatësit që të vlerësojnë me paanshmëri dëshmitë e mija. Në rast se ata e bëjnë këtë në mënyrë profesionale ata lehtë mund të vijnë në përfundim se unë nuk kam bërë asnjë krim lufte”, kishte thënë Thaçi para mediave.
/faxweb
