Presidenti i Kosovës, Hashim Thaçi ka reaguar pas dorëheqjes së kryeministrit Ramush Haradinaj.

 

Kreu i shtetit thekson se e ka pranuar me keqardhje dhe respekton vendimin e kryeministrit Haradinaj për dorëheqjen e parevokueshme dhe ka siguruar qytetarët se me kompetencat e tij do të veproj bazuar në ligj dhe kushtetutë.

 

Ndër të tjera Thaçi është shprehur se i beson pastërtisë së luftës së Ushtrisë Çlirimtare të Kosovës dhe vlerave të larta morale të ushtarëve të lirisë.

 

“Me keqardhje mësova që Gjykata Speciale ka ftuar për intervistim ish-shefin e Shtabit të Përgjithshëm të UÇK-së, Bislim Zyrapi, njëherësh këshilltar i imi, ish-komandantin e Zonës Operative të Dukagjinit, kryeministrin Ramush Haradinaj, si dhe disa ish-eprorë të tjerë të UÇK-së. Nga mediat tani u informova edhe për vendimin e Kryeministrit të Republikës së Kosovës, Ramush Haradinaj, për dorëheqjen e parevokueshme nga pozita e tij. Unë e respektoj vendimin e tij dhe si President i Republikës së Kosovës ju siguroj se do të veprojë bazuar në kompetencat e mia kushtetuese dhe ligjore, për të cilat qytetarët e Kosovës do të njoftohen me kohë. Unë besoj në pastërtinë e luftës së Ushtrisë Çlirimtare të Kosovës dhe besoj në vlerat e larta morale të ushtarëve të lirisë. As vlerat e lirisë sonë dhe as luftën e UÇK-së nuk mund ta cenojë askush!”