Skip to content

Thirja e një nëne shqiptare drejt Boris Johnson: Mos ma çoni djalin në Ruandë, do i japë fund vetes

Ndajeni këtë artikull me të tjerë duke klikuar ikonat më poshtë

Emigrantët që mundën të kalojnë kanalin anglez me varka të vogla, kanë marrë tashmë letra paralajmëruese, se mund të dërgohen në Ruandë (Afrikë).

Lajmërimin e një vendimi politik mjaft të debatuar në Britani, e morën edhe një grup i vogël emigrantësh nga Shqipëria. Edhe ata mund të deportohen në Ruandë, pasi janë kapur nga autoritetet britanike.

Një prej 7 emigrantëve të grupit të fundit që u kap, është një shqiptar rreth të 20-tave. Edhe ai mund të deportohet. Media britanike Daily Mail i ka kushtuar një artikull rastit, teksa ka marrë në intervistë nënën e të riut, një grua që jeton në një fshat të Shqipërisë.

Po sjellim më poshtë, pjesë nga artikulli i Daily Mail.

Artikulli

Teksa na flet nga një dhomë e banesës së saj në një fshat të largët, nëna e emigrantit shqiptar, e cila është në të pesëdhjetat, na tregoi: Zoti e ndihmoftë djalin tim!

“Im bir më tregoi se do të vriste veten nëse Britania e dërgon për të jetuar në Afrikë. I lutem kryeministrit Johnson, të mos e dërgojë tim bir në Ruanda. Nuk do e shoh më kurrë tim bir”-thotë nëna e emigrantit.

Ajo kujton momentin e fundit me të birin. I dha puthjen e lamtumirës në kohën e Krishtlindjeve (dhjetor) teksa ai u nis në Britani për të punuar në ndërtim.

“Im bir donte të shkonte në Britani, por edhe të qëndronte me mua. Mendja e tij ishte e dyzuar. Tani unë jam e vetme. Me dy lopë që janë e vetmja e ardhur e imja. Kur djali mbërriti në Britani, nuk më tha se e kishin kapur. Disa javë më parë më telefonoi. Dukej i trembur. Më tregoi se autoritetet britanike do ta dërgonin në Ruanda. Ai më tregoi se nëse do ta detyronin të jetonte në Afrikë, do të varte veten. Fjalët e tij ishin: Atje nuk shkoj!”-tregoi nëna e emigrantit shqiptar.

Emigranti, ashtu si qindra të rinj shqiptarë që nisen drejt Britanisë, i kishte treguar autoriteteve se trafikantët kishin organizuar të gjithë rrugëtimin e tij, fillimisht nga fshati i tij në veri të Shqipërisë, e mandej në Francë. Pasi kishte kaluar 7 muaj në një kamp emigrantësh atje, ishte nisur përmes kanalit anglez drejt Britanisë.

Sipas autoriteteve policore shqiptare, i riu nuk ka asnjë rekord kriminal.

Kur e pyetëm nënën e të riut sesi ai i gjeti paratë për udhëtimin, ajo tha: Mbase trafikantët që e kanë dërguar atje do ta vinin në punë për të bërë para e për të paguar udhëtimin e tij.

Sipas burimeve, djali (si shumë të tjerë) ishte drejt deportimit, kur në dritë doli një vendim i Gjykatës Europiane për të Drejtat e Njeriut dhe fluturimi u anulua. Këtë fundjavë, ai ndodhet ende në qendrat e paraburgimit, ndërsa autoritetet presin përfundimin e rishikimit të ligjit (nga Gjykata e Lartë) për deportimin e emigrantëve në Ruandë.

10 emigrantë shqiptarë, të cilët janë pjesë e disa dhjetëra të kapurve nga autoritetet britanike, kanë marrë njoftim se do të dërgohen në Ruanda.

Burimi: Daily Mail/ Përshtati me disa shkurtime: Shqiptarët për Shqiptarët.info

Ndajeni këtë artikull me të tjerë duke klikuar ikonat më poshtë