Përveç shtimit të hapësirave të gjelbra, liqeni artificial në Tiranë është kthyer në një vend të rëndësishëm për aktivitet sportive. Për herë të parë në kodrat e liqenit u zhvillua kampionati “Survivor Games”, një event që promovon jetesën aktive në natyrë me pjesëmarrjen 16 skuadrave. I pranishëm në nisjen e kampionatit ishte edhe kryetari i bashkisë së Tiranës, i cili tha se ky park tashmë është kthyer në një alternative mjaft të mirë për shumë të rinj.
“Kush është rritur në Tiranë, e mban mend se kjo hapësirë ka qenë një pellgaçe e madhe, një gjysmë kënete. U bënë protestat për këndin e lodrave dhe ja ku jemi sot. Kushdo që merr vendime të drejta ndihet i shpërblyer kur shikon që këto vendime ia kanë bërë jetën më të lehtë, ndoshta edhe më të mirë, komunitetit, duke i dhënë një alternativë tjetër të rinjve”, tha Veliaj.
Veliaj theksoi se përmirësimi i infrastrukturës gjatë viti 2017 uli numrin e kafeneve dhe basteve në kryeqytet.
“Me statistikat e bizneseve të bashkisë, ishte hera e parë që ra numri i kafeneve të reja, i basteve dhe i bingove, dhe u shtua numri i palestrave, i bibliotekave, i këndeve të lodrave dhe i terreneve sportive. Për t’u bërë europianë, e paskemi vetë në dorë, mjafton të marrim vendime si europianë, të sillemi si europianë, të ushtrohemi si europianë, të rilidhemi me natyrën dhe me njëri-tjetrin”, shtoi ai.
I pranishëm në këtë aktivitet ishte edhe deputeti socialist, Eduard Shalsi, i cili tha se kryeqyteti është një model që duhet të ndiqet në të gjithë Shqipërinë.
