Fotografitë tronditëse nga transportimi i gjësë së gjallë në rrugë detare kanë shtyrë autoritetet në Australi të bashkohen me thirrjet për pezullimin e përkohshëm të eksporteve. Pas publikimit të më shumë imazheve që tregonin ekipin e anijeve që eksportojnë gjë të gjallë duke u përpjekur të pastrojnë një kufomë tërësisht të dekompozuar deleje që kishte ngordhur nga i nxehti, autoritetet publike nuk mund të mos dorëzoheshin.
Fotografitë dhe klipi janë filmuar në një anije ekspres me flamur të Panamasë nga Faisal Ullah, i cili më herët kishte publikuar fotografi nga pesë rrugëtime të kompanisë australiane “Emanuel Exports”.
Fotografitë tregojnë sesi ekuipazhi pastron kufomat e deleve të dekompozuara dhe përpiqet t’i hedhë ato në det.
Kufomat e kafshëve, që kishin vetëm pak orë të ngordhura, shpërbëheshin në prekje, në një mënyrë të tillë që veterineri Dr Lynn Simpson thotë se tregon se ato ishin valuar nga përbrenda.
Skenat u filmuan në rrugëtimin famëkeq tashmë të Awassi Express nga Fremantle drejt shteteve të Gjirit në gusht 2017 gjatë të cilit ngordhën 2400 dele nga problemi me të nxehtit.
Publikimi vjen disa ditë pasi laburistët thanë se do të ndalonin tregtinë e deleve të gjalla, pavarësisht se më parë do të pritet për rezultatet e një rishqyrtimi të kushteve të kafshëve nga ministria e Bujqësisë.
Rishqyrtimi do të kryhet nga veterinerët të cilët do të vlerësojnë menaxhimin e stresit nga të nxehtit dhe mbyllja së bashku në vende të mbyllura të kafshëve, në tregtinë e gjësë së gjallë.
Autoritetet thonë se do të zbatojnë rekomandimet edhe nëse ato sjellin pezullim të tregtisë gjatë verës.
Po ashtu, autoritetet australiane do të aplikojnë gjoba më të rënda për eksportuesit që thyejnë rregullat e mirëqënies të kafshëve, që mund të shkojnë deri në më shumë se 1 milion dollarë dhe burgosje deri në 10 vjet.
Zyrtarët thanë se filmimet që tregojnë punëtorët duke hedhur në det kufomat e deleve, me minimumin e masave të sigurisë, shfaqin kushtet e këtyre anijeve si “një ferr të vërtetë” si për punëtorët ashtu edhe për kafshët.
“Trishtueshëm, trajtimi tepër mizor i kafshëve në bordet e anijeve të eksportit shpesh është i barabartë me trajtimin e pabesueshëm të marinarëve dhe këto filmime janë një kujtesë e tmerrshme sesi mund të jetë jeta në det kur punëtorët nuk kanë asnjë të drejtë”, thuhet në deklaratë.
Anija në qendër të debatit, “Awassi Express”, ishte nisur nga Fremantle pa ngarkesë pas një vonese dyjavore nga rregulluesi detar që e ndaloi të ngarkonte dele për në Lindjen e Mesme. Në vend të këtij itinerari, anija pritet të arrijë në Broome për t’u ngarkuar me lopë për në juglindje të Azisë.
Drejtuesit e kompanisë thanë se ngordhjet masive të vitit të kaluar në anijet e saj ishin për shkak të “ngjarjeve katastrofike të motit” dhe se ndalimi i tregtisë gjatë verës do të thotë “se biznesi do mbyllet tërësisht dhe fermerët do të shesin fermat e tyre”.
Veterineri në bordin e anijeve të “Emanuel Exports” që u largua nga Fremantle me 68 mijë dele në bord, tha se “problemi i të nxehtit ishte një problem shumë minimal”. Rreth 3 mijë dele ngordhën nga temperatura e larta në këtë udhëtim të vetëm të anijes “Al Messilah” të kësaj kompanie, në vitin 2016.
Analistët thonë se Australia ka hetuar 70 raste të ngordhjeve masive të kafshëve në 10 vjetët e fundit dhe asnjë prej tyre nuk ka përfunduar me gjobitjen e eksportuesit apo heqjen e licencës.
Përgatiti: Juli Prifti –
