Tri anije me flamur të Panamasë janë goditur nga raketat ruse në Detin e Zi që nga fillimi i luftës së Rusisë kundër Ukrainës, njoftoi Autoriteti Detar i Panamasë (AMP).
“E dimë se kishim tri anije që pësuan sulme nga raketat ruse, por ekuipazhi është i sigurt”, u tha administratori i AMP-së, Noel Arauz gazetarëve gjatë një paraqitjeje publike.
Sipas tij, njëra nga anijet u përmbyt dhe megjithëse dy të tjerat mbeten në det, ato pësuan dëme të konsiderueshme materiale që pamundësojnë funksionimin e tyre.
Një ditë pasi filloi aksioni ushtarak rus në Ukrainë, transportuesi me flamur panamez Namura Queen u godit nga një raketë në portin Pivdenny pranë Odessa-s, Ukrainë, pa të dhëna për të lënduar, raportoi AMP, e cila lëshoi një alarm për anijet nën flamujt e saj që mbeti në ujërat midis Ukrainës dhe Rusisë.
“Ato anije panameze në portet e Ukrainës ose që kalojnë tranzit nëpër zonë duhet të kenë vigjilencën maksimale dhe të rrisin kushtet e sigurisë në bord për të mbrojtur anijen dhe ekuipazhin”, paralajmëroi ai në një deklaratë.
Dy anijet e tjera të prekura ishin Lord Nelson dhe Helt. AMP nuk dha datat se kur u goditën.
Arauz denoncoi se marina ruse nuk po lejon 200 deri 300 anije nga pjesë të ndryshme të botës të largohen nga Deti i Zi, përfshirë 10 nga Panamaja.
Panamaja është aktualisht vendi me numrin më të madh të anijeve në botë, me rreth 8.000, që përfaqëson 17 për qind të flotës botërore, sipas AMP.
