Tubacioni Nord Stream 2 do të vihet në veprim para fundit të vitit 2020 përkundër sanksioneve amerikane, tha ministri rus i energjisë Aleksandër Novak.

Kjo pasi ministri ka treguar që anija e tubave të Gazpromit, “Academician Cherskiy”, mund të përdoret për të përfunduar ndërtimin e North Stream 2, “por do të duhet ca kohë për përgatitje shtesë”.

Kjo anije aktualisht është në Lindjen e Largët Ruse.

Ndërmarrja zvicerane-holandeze Allseas, e cila vendosi tubacione në fund të detit Baltik, ka pezulluar punën pasi Shtetet e Bashkuara vendosën sanksione për projektin e North Stream 2.

Për të përfunduar tubacionin, mbetet një seksion 160 kilometër afër ishullit danez Bornholm.

Deklarata e Novak u përcoll gjithashtu nga Reuters, duke thënë se Gazprom në vitin 2016 bleu një anije të posaçme për hedhjen e tubave “Academician Cherskiy”, e vendosur tani në portin rus të Nahodka në Paqësor.

Ministri Novak shton se duhen pothuajse 45 ditë që Cherskiy të arrijë në zonën e Bornholm përmes Kanalit të Suezit, ose pothuajse 37 ditë nëse përdoret një rrugë përtej Detit të Veriut në Arktikun Rus, duke kërkuar që anija të ndjekë një akullthyese.