Franca do të paraqesë në Këshillin e Sigurimit të Kombeve të Bashkuara (KS-OKB) projekt-rezolutë që kërkon armëpushim mes Izraelit dhe Palestinës.
Këshilli i Sigurimit të OKB-së u mblodh në një seancë të mbyllur për herë të katërt për të diskutuar për sulmet ajrore ndaj Gazës dhe tensionet mes Izraelit dhe Palestinës.
Sipas informacioneve që gazetari i AA-së ka marrë nga burimet diplomatike pas mbledhjes, mësohet se Franca me Tunizinë do t‘i paraqesin Këshillit të Sigurimit të OKB-së një projekt-rezolutë që kërkon “armëpushim dhe qasje të ndihmave humanitare”.
Ndërsa Zhang Jun, përfaqësuesi i përhershëm në OKB i Kinës e cila ka presidencën e radhës për muajin maj në Këshill, në një deklaratë për gazetarët pas mbledhjes tha se “Dhunës, konflikteve duhet t‘i jepet fund dhe civilët duhet të mbrohen”.
KS-OKB është mbledhur më parë tri herë për të diskutuar krizën Izrael-Palestinë por për shkak të qasjes pro-izraelite të SHBA-së e cila ka të drejtën e vetos, deri më tani në Këshill nuk është ndërmarrë ndonjë hap.
Sipas OKB-së, për shkak të sulmeve ajrore të Izraelit ndaj Gazës janë zhvendosur mbi 58 mijë palestinezë.
Në sulmet që Izraeli ka ndërmarrë që nga 10 maji e deri më tani në Rripin e Gazës kanë humbur jetën 218 persona, përfshirë 63 fëmijë dhe 36 gra ndërsa janë plagosur 1.507 të tjerë.
