Një 51-vjeçar është arrestuar nga policia pasi akuzohet se i dha turistit belg Jet Ski, i cili pësoi aksident në det, pa masat e sigurisë të nevojshme. Ngjarja ndodhi ditën e djeshme (15 Qershor), në zonën e “Shkëmbit të Kavajës”.
Në pranga ka rënë shtetasi me iniciale S. Xh., banues në Tiranë, për veprat penale “Shkelja e rregullave të mbrojtjes në punë” dhe “Veprime që pengojnë zbulimin e së vërtetës”.
Raportohet se 51-vjeçari i ka dhënë me qira mjetin lundrues, pa masat e sigurisë të nevojshme, turistit me iniciale H. K., i cili nuk ishte i pajisur me leje drejtimi për këtë kategori mjetesh.
Ky i fundit ndodhet u dëmtua gjatë manovrave me mjetin lundrues dhe vijon të jetë në spital në gjendje të rëndë për jetën nën kujdesin e mjekëve.
Njoftimi i policisë:
Durrës
Specialistët për Hetimin e Krimeve të Stacionit të Policisë Plazh arrestuan në flagrancë shtetasin S. Xh., 51 vjeç, banues në Tiranë, për veprat penale “Shkelja e rregullave të mbrojtjes në punë” dhe “Veprime që pengojnë zbulimin e së vërtetës”.
Nga veprimet hetimore të kryera në drejtimin e Prokurorisë, për ngjarjen e ndodhur ditën e djeshme, në zonën e quajtur “Shkëmbi i Kavajës”, rezultoi se shtetasi S. Xh. i ka dhënë me qira një mjet lundrues Jet Ski, pa masat e sigurisë të nevojshme, shtetasit belg H. K., i cili nuk është i pajisur me leje drejtimi për këtë kategori mjetesh. Gjithashtu, shtetasi S. Xh., gjatë kryerjes së veprimeve procedurale, ka dhënë informacione të rreme për rastin.
Shtetasi H. K., që u dëmtua gjatë manovrave me mjetin lundrues, vijon të jetë në spital, në kujdesin e mjekëve.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
