Presidenti turk Rexhep Tajip Erdogan njoftoi se Turqia do të nënshkruajë një marrëveshje të tregtisë së lirë me Britaninë e Madhe.
Erdogan kryesoi seancën e fundit të kabinetit këtë vit në Pallatin Presidencial në Ankara dhe iu drejtua kombit pas seancës, duke theksuar se marrëveshja e tregtisë së lirë me Britaninë do të jetë marrëveshja më e rëndësishme tregtare e Turqisë që nga Marrëveshja e Bashkimit Doganor e nënshkruar nga Turqia në 1995 me Bashkimin Europian.
“Deri më 25 dhjetor, eksportet tona tejkaluan të gjitha parashikimet dhe u rritën në 166 miliardë dollarë. Me investime të larta të vlerës së shtuar, ne mbyllim deficitin dhe ulim nevojën për financim të jashtëm. Një periudhë e re fillon në 2021, e cila do të jetë e dobishme si për Turqinë dhe Britaninë e Madhe,” tha ai.
Departamenti i Tregtisë i Mbretërisë së Bashkuar njoftoi të dielën se të dy vendet do të nënshkruajnë një marrëveshje që kopjon kushtet ekzistuese të tregtisë, sipas Reuters. Kjo është marrëveshja e parë zyrtare që kur kryeministri britanik Boris Johnson siguroi një marrëveshje të re tregtare me Bashkimin Evropian javën e kaluar.
Marrëdhëniet tregtare midis Londrës dhe Ankarasë vitin e kaluar kishin vlerë 18,6 miliardë paund (25,25 miliardë dollarë amerikanë) dhe Mbretëria e Bashkuar deklaron se kjo është marrëveshja e pestë më e madhe tregtare e arritur nga kjo ministri pas marrëveshjes me Japoninë, Kanadanë, Zvicrën dhe Norvegjinë.
Deri më tani, Britania e Madhe ka nënshkruar marrëveshje tregtare me 62 vende përpara periudhës së tranzicionit Brexit më 1 janar kur ajo lë marrëveshjet tregtare të BE-së.