Në takimin katërpalësh të mbajtur në Moskë ndërmjet Türkiyes, Rusisë, Iranit dhe regjimit sirian u diskutua për përforcimin e sigurisë në Siri.
Në njoftimin e Ministrisë së Mbrojtjes Kombëtare të Türkiyes thuhet se në takimin për Sirinë u trajtuan hapat konkretë që mund të ndërmerren për normalizimin e marrëdhënieve Türkiye-Siri.
Njoftimi vjen pasi ministri turk i Mbrojtjes, Hulusi Akar dhe kreu i Organizatës Kombëtare të Inteligjencës (MIT), Hakan Fidan, morën pjesë në një takim me homologët e tyre në kryeqytetin rus.
“Takimi katërpalësh për Sirinë diskutoi luftën kundër organizatave terroriste dhe të gjitha grupeve ekstremiste në territorin sirian”, shtoi ai.
Ministria njoftoi se shefat e mbrojtjes dhe inteligjencës turke, ruse, iraniane dhe siriane diskutuan gjithashtu shtimin e përpjekjeve për kthimin e refugjatëve sirianë në vendin e tyre.
Palët përsëritën gjithashtu respektin e tyre për integritetin territorial të Sirisë.
“Si rezultat i takimit, i cili u mbajt në një atmosferë konstruktive, u theksua rëndësia e vazhdimit të takimeve në formatin katërpalësh për të siguruar dhe ruajtur stabilitetin në Siri dhe në rajon në tërësi”, thuhet në deklaratë.
Dhjetorin e kaluar, ministrat e Mbrojtjes dhe shefat e inteligjencës së Türkiyes, Rusisë dhe regjimit sirian u takuan në Moskë dhe ranë dakord të vazhdojnë takimet trepalëshe për të garantuar stabilitetin në Siri dhe rajonin më të gjerë.
Në bisedime u përfshi edhe Irani, ndërsa Türkiye tha më parë se Ankaraja do të ishte “e kënaqur nëse Irani përfshihet në këtë proces”.
Në fillim të këtij muaji, ministri turk i Punëve të Jashtme, Mevlüt Çavuşoğlu, sinjalizoi se një takim midis ministrave të jashtëm të Türkiyes, Rusisë, Iranit dhe regjimit sirian mund të mbahet në fillim të muajit maj në Moskë.
Edhe pse ende nuk është shpallur data apo vendndodhja, takimi i ministrave të jashtëm do të jetë vazhdim i përpjekjeve për rifillimin e bisedimeve të nivelit të lartë midis Türkiyes dhe fqinjit të saj Sirisë që nga fillimi i luftës civile në vend në 2011.
Burimi: AA
