Twitter fshiu një postim nga ambasada kineze në Shtetet e Bashkuara duke pretenduar se Pekini kishte inkurajuar “emancipimin” e anëtarëve të pakicës ujgure në provincën Xinjiang.
Cicërima e ambasadës kineze përmbante një lidhje me një artikull të medias shtetërore duke pretenduar se ujgurët, falë masave për të luftuar ekstremizmin e pretenduar fetar, nuk janë më “makina për lindjen e fëmijëve”, raporton BBC.
Ujgurët janë një pakicë e besimit kryesisht musliman dhe jetojnë në provincën Xinjiang, në Kinën veriperëndimore.
Ambasada pretendoi në një cicërimë, botuar të enjten, se anëtarët e pakicës ujgure, falë promovimit të shëndetit riprodhues, janë më të sigurt në vetvete dhe më pak të varur nga burrat.
Akuzat e sterilizimit të detyruar
Fundjavën e kaluar, postimi u zëvendësua nga një mesazh në Twitter se shkelte rregulloret e platformës, pa detaje të mëtejshme.
Sinologu gjerman Adrian Zenz pretendoi në një raport të botuar vitin e kaluar se Pekini kishte detyruar shumë anëtarë të pakicës ujgure të sterilizoheshin, në mënyrë që të kontrollonte madhësinë e asaj popullsie.
Por Kina e mohon këtë.
Zëdhënësi i Ministrisë së Jashtme Zhao Lijian akuzoi mediat për “prodhimin e informacionit të rremë për çështje të lidhura me Xinjiang”.
