Të gjithë pensionistët sot kanë mbushur rrugët e thuajse të gjitha lagjeve të Tiranës. Tek i shihje fitimtarë të paktën deri në orën 11 të ditës së sotme, shumë të moshuar kanë pohuar se u çliruan dhe ringjallën nga lufta me armikun e padukshëm qoftë edhe për një ditë të vetme.
Pas më shumë se një muaji të izoluar nëpër shtëpi, të moshuarit kanë pasur mundësit këtë të shtunë për të dalë një xhiro të shkurtër në kryeqytet.
Vendimi u mor pasditen e djeshme nga kryeministri Edi Rama, i cili iu dha mundësi të moshuarve të dalin nga ora 08:00 deri në orën 11:00. Ka prej atyre me shtëpi private, të cilët nuk e kanë ndjerë shumë izolimin, por të tjerë në apartamente e kanë kaluar me jo pak stres këtë periudhë.
Bazuar në urdhrin e fundit të Kryeministrit të vendit, për lejimin e pensionistëve për të dalë ditën e shtunë deri në orën 11:00, Policia e Shtetit do të mirëpresë e asistojë pensionistët, për të respektuar distancimin social.
Policia e Shtetit kërkon mirëkuptimin e pensionistëve që të mos ulen në grupe nëpër parqe apo lulishte, të mos jenë më shumë se dy persona bashkë dhe pas orës 11:00, duhet të kthehen në banesë. Shërbimet e Policisë do të jenë pranë tyre për çdo rast nevoje që ata mund të kenë.
Ndërkohë, në të gjithë vendin do të vijojnë kontrollet e pandërprera kryesisht në qendrat urbane, për respektimin e karantinës. Do të lejohen të qarkullojnë me makinë, të pajisur me autorizim apo në këmbë, në itinerarin shtëpi – punë – shtëpi, pa asnjë ndalesë të gjithë personat që kanë autorizim për të punuar gjatë fundjavës.
Të gjithë të tjerët duhet të respektojnë masat kufizuese për të mos dalë nga banesa deri në orën 05:00 të ditës së hënë, duke përjashtuar lëvizjet për emergjencat mjekësore.
