Është zbardhur letra e dorëheqjes së kryetares së komanduar të Himarës, Blerina Bala, drejtuar anëtarëve të Këshillit Bashkiak.
Blerina Bala shkruan se letra e saj e dorëheqjes është e parevokueshme, ndërsa theksoi se vendimin e ka marrë për arsye personale.
“Sidoqoftë për shkaqe personale që kërkojnë kohën dhe vëmendjen time të plotë, me keqardhje ju njoftoj pamundësinë time për të vazhduar detyrën e Kryetares së Bashkisë Himarë që mu besua dhe nga Këshilli Bashkiak Himarë”, shprehet ajo.
Blerina Balla theksoi se ishte privilegj të drejtonte Bashkinë Himarë “për këtë periudhë aq sa të vështirë dhe të mrekullueshme për mua”.
LEXONI EDHE: Jep dorëheqjen kryetarja e komanduar e Bashkisë së Himarës! Blerina Bala qëndroi vetëm pak javë në krye të detyrës
Letra e Blerina Balajt:
Të nderuar anëtar të Këshillit Bashkiak Himarë!
Ndjehem e nderuar dhe e privilegjuar që mu dha mundësia të drejtoja Bashkinë Himarë për këtë periudhë aq sa të vështirë dhe të mrekullueshme për mua.
Gjatë kësaj kohe jam përpjekur të punoj me përkushtim dhe e palëkundur, për të trajtuar dhe zgjidhur çështjet që janë paraqitur para meje.
Sidoqoftë për shkaqe personale që kërkojnë kohën dhe vëmendjen time të plotë, me keqardhje ju njoftoj pamundësinë time për të vazhduar detyrën e Kryetares së Bashkisë Himarë që mu besua dhe nga Këshilli Bashkiak Himarë.
Me këtë letër, sot zyrtarisht paraqes dorëheqjen time të parevokueshme nga pozicioni i Kryetares së Bashkisë Himarë.
Dua të shpreh falenderimet dhe mirënjohjen më të thellë stafit të Bashkisë Himarë, Këshillit Bashkiak Himarë dhe cdo banori të Himarës për mbështetjen dhe për vlerat njerëzore që kemi ndarë gjatë kësaj periudhe.
Përulësisht kërkoj të pranoni mirënjohjen time të sinqertë, për bashkëpunimin dhe për cdo gjë që kemi arritur së bashku.
Me respekt, Blerina Bala
