Sekretari i Përgjithshëm i LSI, Endrit Braimllari reagoi pasi u gjobit me 50 milionë lekë të vjetër për moszbatimin e masave anti-COVID.
Sipas tij, gjoba tregon se kryeministri Edi Rama i frikësohet LSI. Ai i bëri thirrje policisë që të mos merret me gjobat për maskat, por të kapë kriminelët.
“Kryeministri Edi Rama është i tmerruar nga rritja e pandalshme e LSI në Qarkun e Korçës. Gjoba tregon tmerrin që Edi Rama ka ndaj LSI.
Edi Rama, Niko Peleshi nuk mund të intimidojnë simpatizantët e LSI me ushtarin e tyre në drejtorinë e qarkut të Korçës, Ferdinand Mara. Ferdinand Mara është ushtar i Edi Ramës, Niko Peleshit dhe Rragamit të bëjë kujdes të respektojë ligjin dhe të merret me trafikantët dhe trafikun e drogës dhe jo të gjobisë qytetarët e ndershëm.
Më 25 prill të rinjtë dhe të rejat e Korçës do të çmontojnë këtë treshe që ka marrë peng Korçën”, deklaron numri dy i LSI!
Braimllari u gjobit pas takimeve masive që kishte zhvilluar në Korçë, me qytetarë që nuk mbanin maska dhe nuk respektonin distancën.
