Skip to content

U kontrollua kontenieri me mish pule nga Brazili, ja si u zbuluan 45 kg kokainë me figurën e “Gok”-ut në portin e Durrësit

Ndajeni këtë artikull me të tjerë duke klikuar ikonat më poshtë

Policia ka dhënë detaje lidhur me zbulimin e 45 kilogramëve kokainë në portin e Durrësit. Në njoftimin zyrtar thuhet se pas dyshimeve të krijuara vazhdimisht, ishte kontrolluar kontenieri i cili supozohej të përmbante mish pule nga Brazili.

Konteineri ishte nisur drejt Maqedonisë së Veriut. Ndërsa pas kontrollit të imtësishëm të bërë në kuadër të operacionit “Tranzit” u gjetën pako të mbështjella me peshë 45 kilogramë e 500 gramë të cilat përmbanin lëndë narkotike të llojit “kokainë”.

Njoftimi i Plotë:

Port, Durrës – Task Forca permanente e përbashkët e përbërë nga Policia Kriminale e DVP Durrës, Policia Kufitare e Portit të Durrësit dhe autoritetet doganore të Portit, evidentojnë dhe godasin një tjetër rast të trafikimit të lëndëve narkotike.

Finalizohet një tjetër operacion policor antidrogë, i koduar “Tranziti”.

Operacioni, nga Task Forca permanente e përbërë nga strukturat hetimore të Drejtorisë Vendore të Policisë Durrës, Policia Kufitare e Portit të Durrësit dhe autoritetet doganore të Portit.

Sekuestrohen 45 kilogramë e 500 gramë lëndë e dyshuar narkotike kokainë.

Në vijim të goditjeve të njëpasnjëshme ndaj veprimtarisë kriminale të tentativës për trafikim të drogave të forta, si rezultat i kontrolleve të shtuara, bazuar edhe në analizën e riskut të bërë nga Task Forca permanente e përbërë nga Policia Kriminale e Drejtorisë Vendore të Policisë Durrës, Policia Kufitare e Portit të Durrësit dhe nga autoritetet doganore të Portit, e cila vepron në Portin e Durrësit, në bazë të dyshimeve të krijuara nga kjo Task Forcë dhe informacioneve që dispononte Policia Kriminale e DVP Durrës, është ushtruar kontroll i detajuar në një kontenier të ngarkuar me mish pule, që ishte nisur tranzit nga Brazili, për llogari të një subjekti tregtar në Maqedoninë e Veriut.

Si rezultat i kontrollit të imtësishëm të ushtruar në kontenier, në brendësi të ngarkesës me mish pule u gjetën 40 pako me lëndë të dyshuar narkotike kokainë, me peshë 45 kg e 500 gramë.

Grupi hetimor, nën drejtimin e Prokurorisë pranë Gjykatës së Rrethit Gjyqësor Durrës, vijon veprimet hetimore për dokumentimin e plotë kësaj veprimtarie kriminale, identifikimin dhe kapjen e personave të përfshirë në të.

Materialet do t’i kalojnë Prokurorisë pranë Gjykatës së Rrethit Gjyqësor Durrës, për veprën penale “Trafikimi i lëndëve narkotike”.

/faxweb

Ndajeni këtë artikull me të tjerë duke klikuar ikonat më poshtë