Ish-ministrja e Arsimit Evis Kushi, ka reaguar për herë të parë, pas shkarkimit nga posti i ministres.
Përmes një postimi në Facebook, Kushi ka falënderuar të gjithë bashkëpunëtorët e saj gjatë drejtimit të Ministrisë së Arsimit.
Po ashtu, Kushi ka uruar dhe ministren Ogerta Manastirliu për marrjen e drejtimit të Ministrisë së Arsimit, ndërsa ka falënderuar më tej “çdo sportist që ka ngritur lart flamurin kuqezi, duke na dhuruar krenari dhe emocione të paharruara”.
Reagimi i Evis Kushit
Të shërbeja si Ministre e Arsimit dhe Sportit për vendin tim 🇦🇱 ka qenë nderi më i madh në jetën time, për të cilin kam punuar çdo ditë me mendje e zemër, me përkushtim dhe përgjegjshmëri të lartë, për ta përmbushur me sukses e për të bërë më të mirën në çdo hap.
Dua të falënderoj 🙏 thellësisht të gjithë ata që i kisha në krah përgjatë këtij rrugëtimi, mësues, pedagogë e kolegë në ministri, me të cilët kemi kapërcyer shumë sfida të vështira në këto tre vite, veçanërisht pasojat e tërmetit dhe pandemisë, por edhe kemi realizuar shumë reforma transformuese, që do të kenë impakt për shumë kohë në të ardhmen, që nga abetarja e përbashkët unike, përmirësimi i infrastrukturës arsimore, digjitalizimi e deri tek ndërkombëtarizimi i universiteteve.
Shumë faleminderit edhe çdo sportisti që ka ngritur lart flamurin kuqezi, duke na dhuruar krenari dhe emocione të paharruara me 🏆🥇 medaljet e fituara! Falë punës sonë të përbashkët, sportistët sot vlerësohen me më shumë dinjitet dhe Shqipëria është ngritur në një nivel të ri në arenën ndërkombëtare.
Mirënjohje pa fund për Kryeministrin Edi Rama që më dha besim dhe mbështetje të pakursyer për ta përmbushur me sukses këtë mision të lartë!
Jam e bindur që Ogerta do të vijojë në rrugën e reformave të nisura, për ta ngritur më lart cilësinë e arsimit dhe sportit, drejt standardeve më të mira bashkëkohore, siç e meritojnë fëmijët dhe të rinjtë tanë
