Dy motrat binjake Xhorxhia e Melisa Lauri kishin ndërmarrë një udhëtim së bashku drejt një sërë vendesh ekzotike. Stacioni i radhës ishte një lagunë e njohur në Meksikë. Vajzat marrin një guidë turistike (e cila rezultoi të ishte e paregjistruar) dhe udhëtojnë me barkë në lagunë. Drejtuesi i guidës i kishte thënë që mund të laheshin, pavarësisht se në atë zonë kishte krokodilë.
Por teksa vajzat po notonin, Melisa sulmohet nga një krokodil. E motra bën çështë e mundur për të larguar kafshën. E godet me grushte dhe mundohet ta largojë teksa krokodili e rrotullon si një ‘copë lecke’ të motrën. Pas disa momenteve tmerri, krokodili e lëshon 28 vjeçaren.
Melisa kishte plagë të rënda në bark e këmbë dhe shtrohet në spital në gjendje të rëndë shëndetësore. Mjekët e fusin 28 vjeçaren në koma, pasi plagët i ishin infektuar dhe trupi i saj po përjetonte një gjendje të njohur si ‘sepsis’ ( reagim ekstrem i trupit prej një infeksioni, i cili mund të çojë në mosfunksionimin e organeve, e rrjedhimisht në vdekje). Ngjarja ndodhi një javë më parë, ndërsa tashmë mediat britanike (vajzat binjake janë shtetase angleze) kanë dhënë detaje në lidhje me gjendjen shëndetësore të dy motrave.
Melisa është zgjuar nga koma dhe ndodhet nën terapi intensive. Motra e saj Xhorxhia tha në një prononcim për radio1 newsbeat se e motra “është shumë më mirë tani” dhe se “po merr frymë pa nevojën e tubave”.
Ndërkohë Hana, motra e madhe e dy binjakeve, foli për BBC, nga ku tha se gjendja e të motrës është ende serioze.
“Në mushkëritë e saj mjekët gjetën ujë e barishte. Gjendja e saj është ende serioze dhe ne ende nuk jemi qetësuar plotësisht”
Vetë pacientja, Melisa, ka folur sot për herë të parë. Mesazhet e para ajo ia adresoi të motrës, që i shpëtoi jetën.
“Jam e lumtur që arrita të dal gjallë nga atje dhe që motra ime luftoi në krahun tim. Shumë e lumtur jam”