Irani tha se marina e tij kapi dy drone të marinës amerikane në Detin e Kuq dhe më pas i lëshoi ata.
Televizioni shtetëror iranian transmetoi pamjet e marra në destrojerin iranian “Jamaran”, ku marinarët inspektojnë dy drone të Saildrone Explorers, raporton AP.
Televizioni shtetëror raportoi se marina e Iranit gjeti “disa anije spiune pa pilot të braktisura në rrugët detare ndërkombëtare” të enjten.
“Pas dy paralajmërimeve të dërguara destrojerit amerikan për të shmangur incidente të mundshme, ‘Jamaran’ ka sekuestruar dy mjete lundruese”, thuhet në deklaratë dhe shtohet se, “pas sigurimit të rrugës detare shtetërore, marina i ka lëshuar mjetet lundruese në zonën e sigurt”.
Incidenti i dytë brenda pak ditësh
Gjithashtu u njoftua se “Marina Amerikane është paralajmëruar të shmangë përsëritjen e incidenteve të ngjashme në të ardhmen”.
Ky është rasti i dytë i tillë në ditët e fundit, ndërkohë që mbretëron pasiguria për negociatat për rinovimin e marrëveshjes bërthamore të Iranit me fuqitë botërore.
Në rastin e mëparshëm të tillë në Gjirin Persik, Garda Revolucionare iraniane u përgjigj, jo marina e rregullt.
Flota e Pestë e SHBA-së nisi Task Force 59, një operacion me mjete ajrore pa pilot, vitin e kaluar.
Përgjegjësia e Flotës së Pestë shtrihet, ndër të tjera, në ngushticën e rëndësishme të Hormuzit, kalimin e ngushtë të Gjirit Persik, përmes të cilit kryhet 20 për qind e të gjithë transportit të naftës.
