Ka reaguar dhe Kina ndaj asaj çfarë po ndodh nga mëngjes në Ukrainë. Pra me sulmin rus.
Fuqia e re e botës, krah Rusisë, siç pritej, fajësoi SHBApër krijimin e tensioneve që çuan në sulmin rus ndaj Ukrainës të enjten.
Ndër të tjera, Pekini i ka bërë thirrje komunitetit ndërkombëtar që të shmangë “nxitje të panikut” për shkak të situatës në Ukrainë.
Zëdhënësja e Ministrisë së Jashtme kineze Hua Chunying tha se çështja kryesore ishte roli i amerikanëve, të cilët ajo i etiketoi si “fajtorët kryesorë për tensionet aktuale”.
“Nëse dikush vazhdimisht i shton benzinë zjarrit dhe akuzon të tjerët dhe në të njëjtën kohë nuk bën çmos për të shuar zjarrin, një sjellje e tillë është padyshim e papërgjegjshme dhe e pamoralshme”, tha Hua.
“Kina kundërshton të gjitha aktivitetet që nxisin luftën”, shtoi zëdhënësja.
Hua akuzoi Amerikën për hipokrizi dhe pyeti nëse Uashingtoni respekton sovranitetin dhe integritetin territorial të Irakut dhe Afganistanit, vende ku ajo tha se po vriste qëllimisht të pafajshëm.
Zëdhënësja u bëri thirrje Shteteve të Bashkuara që t’i marrin seriozisht këto çështje dhe të braktisin “standardet e dyfishta”.
Hua e përshkroi situatën në Ukrainë si “komplekse” dhe konfirmoi se Kina nuk i dërgon ndihmë ushtarake Rusisë dhe nuk i jep asaj mbështetje ushtarake.
Një zëdhënëse tha se Kina nuk po merrte “vendime të papritura” për shkak të situatës në Ukrainë.
Hua u bëri thirrje të gjitha palëve që të fokusohen në paqen dhe të shmangin ngritjen e tensioneve dhe nxitjen e panikut.
