Sulmet e Rusisë në infrastrukturën ukrainase të energjisë përbëjnë gjenocid, ka thënë Prokurori i Përgjithshëm i Ukrainës, Andriy Kostin, për transmetuesin britanik, BBC.

 

 

Sulmet në objektet kyçe kanë shënjestruar “gjithë kombin ukrainas” dhe kanë qenë përpjekje për të arritur te dorëzimi i Kievit, ka thënë ai.

 

 

Sipas Konventës së Kombeve të Bashkuara, gjenocidi përfshin “synimin për të shkatërruar, pjesërisht apo plotësisht, një grup kombëtar, etnik, racor apo fetar”.

 

 

Rusia mohon se ka një qëllim të tillë në luftën e nisur në fund të muajit shkurt.

 

 

Miliona persona në Ukrainë janë duke u përballur me ndërprerje të energjisë elektrike në mot të ftohtë, si pasojë e sulmeve ruse.

 

 

Autoritetet ukrainase, në anën tjetër, kanë thënë se janë duke vazhduar punimet për të rregulluar dëmet në rrjet.

 

 

Prokurori Kostin ka thënë se zyra e tij është duke hetuar më shumë se 49.000 krime të luftës prej nisjes së konfliktit.

 

 

Ai ka bërë thirrje për krijimin e një “tribunali ndërkombëtar ad-hoc”, të mbështetur nga “bota e civilizuar ” që kundërshton luftën, në mënyrë që Rusia të mbahet përgjegjëse.

 

 

Lufta në Ukrainë ka nisur më 24 shkurt.

 

 

Presidenti rus, Vladimir Putin, e konsideron luftën si “operacion special ushtarak” për të çmilitarizuar Ukrainën.

 

 

Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.

 

 

Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre.

Subscribe kanalin tonë në Youtube për të mos humbur asnjë video të re