Familja Rrahimi nga Kosova u përball me një sprovë të vështirë. Vajza e tyre Eliesa, mori lëndime serioze në një aksident rrugor pak muaj më parë.
“Ishte data 3 mars, dola të shëtis me vëllaun. Kur erdhi koha për t’u kthyer në shtëpi, papritmas më ndodhi aksident. Kam parë një makinë, kur jam përplas e jam hedhur në tokë. Kur pashë se vëllai merrte frymë, atëerë jam rehatuar. Atë e prunë me një makinë në spital. Atje kam parë mamin e babin.”-tregoi Eliesa.
“Para lajmit të aksidentit, të dy fëmijët më telefonuan për të më thënë se po vinin. Mirëpo, nuk ndodhi. Pas 15 minutash, mora lajmin se fëmijët janë aksidentuar. Keq u ndjeva shumë. Posa shkuam tek vendi i ngjarjes, si e kam parë aksidentin, e kam dit që ka me qenë i rëndë. Kam menduar se njëri ndoshta, nuk mundet me qenë gjallë… derisa i kam parë vetë më sy.
Kur shkuam në spital, goca ishte krejt në gips. Djalin e gjeta më vonë, ai ishte duke lëvizur dhe kishte hallin e motrës. Mjekët kishin hall vajzën, sepse ajo ishte e ulur para në makinë dhe kishte lënduar keq këmbën.
Në operimin e dytë, gjendja ishte më e rëndë, kishte marrë një infeksion shumë të madh. Mjekët na thanë që duhej ta trajtonim jashtë shtetit. Në Turqi duhej një shumë e madhe parash, si t’ja bënim, ishte 25 mijë euro dhe vajza ishte dhe me rrezik për jetën. Isha pa shpresë, por ndodhi një mrekulli.”-tregoi nëna e Eliesës.
“Shqiptarët për Shqiptarët” dhe Fondacioni Firdeus i dolën në krah familjes nga Kosova. Brenda dy ditëve shuma e nevojshme për kurimin e Eliesës u arrit, ndërsa ajo së bashku me të ëmën u nisën për kurim drejt Turqisë. Fatmirësisht, gjithçka shkoi mirë.
“Nëse nuk do të shkoja jashtë vendit, do ta rrezikoja jetën. Falë gjithë shqiptarëve, për dy ditë unë u nisa në Turqi dhe shpëtova. Jam pranë familjes dhe të afërmve të mi dhe kjo falë shqiptarëve.”-tregon vajza nga Kosova.
“Më dukej si ëndërr. Edhe kur mbërritëm dhe vajza u operua, akoma nuk më besohej. Vajza ime sot është shëndoshë e mirë. Unë nga zemra i falenderoj të gjithë, Zoti ju befoktë”-tregoi nëna.
“Dua të falenderoj të gjithë shqiptarët që bënë një mrekulli për mua.”-tha Eliesa.