Të enjten, Selia e Shenjtë publikoi një dokument në të cilin dënonte mizoritë e kryera kundër popujve indigjenë dhe “nuk i njeh” urdhërat papalë të shekullit të 15-të, në të cilën miratohet skllavërimi i tyre, kryesisht në Amerikë, transmeton AFP.
Dokumenti i referohet fushatave të tmerrshme të konvertimeve të detyruara të kryera nga Kisha Katolike pas mbërritjes së evropianëve në kontinentin amerikan.
Teksti do të gjejë interes të veçantë në Kanada, ku 150,000 fëmijë indigjenë u ndanë nga familjet e tyre dhe u dërguan me forcë në 139 shkolla me konvikte, kryesisht të drejtuara nga Kisha, të cilat u privuan nga gjuha dhe kultura e tyre.
Tre urdhëra papalë
Në dokumentin, i cili u botua bashkërisht të enjten nga dikasteritë (ministritë) për kulturën dhe zhvillimin integral njerëzor, Selia e Shenjtë përmend tre urdhëra papalë që u lëshuan në shekullin e 15-të nga nga Nikolla V dhe Aleksandri VI.
Vatikani i konsideron ata urdhëra “dokumenta politikë për të justifikuar veprimet imorale” dhe vlerëson se “asnjëherë nuk kanë qenë shprehje e besimit katolik”. Selia e Shenjtë pranon gjithashtu se urdhërat papalë “nuk pasqyronin në mënyrë adekuate dinjitetin dhe të drejtat e barabarta të popujve indigjenë”.
“Kisha Katolike për këtë arsye refuzon ato kuptime që nuk njohin të drejtat themelore të njeriut të popujve indigjenë, duke përfshirë atë që është bërë e njohur ligjërisht dhe politikisht si ‘doktrina e zbulimit’,” tha ai.
Asimilimi i detyruar
Dokumenti pranon se “shumë të krishterë kanë kryer mizori kundër popujve indigjenë për të cilat papët kanë kërkuar falje në shumë raste kohët e fundit”. Komuniteti katolik, vazhdohet më tej, është i vetëdijshëm për “vuajtjet e tyre, të kaluara dhe të tashme, për shkak të konfiskimit të tokës (…) dhe politikës së asimilimit të detyruar”.
“Mentaliteti se ne jemi më të mirë dhe vendasit nuk janë të rëndësishëm është i rrezikshëm. Kjo është arsyeja pse ne duhet të punojmë në këtë kuptim. Duhet të kthehemi dhe të rregullojmë gjithçka që është bërë keq, por në të njëjtën kohë duhet të jemi të vetëdijshëm se i njëjti kolonializëm është ende gjallë”, tha Papa Françesku në avionin që po merrte për t’u kthyer në Itali nga Kanadaja. /tesheshi.com/
