Nga kompleksi i ri sportiv ‘Partizani’, Erion Veliaj zhvilloi një takim me banorët e Tufinës, Freskut, Dajtit, Zall-Herrit, Shëngjergjit e Zall Bastarit.
Veliaj tha se Partia Socialiste vjen në çdo njësi e në çdo fshat jo vetëm për fushatë, por në çdo kohë për të qenë pranë banorëve.
“Ky ka qenë një rrugëtim i jashtëzakonshëm! Por, ne nuk jemi bashkë vetëm për fushatë. Kemi qenë këtu edhe kur s’ka pasur fushatë. Sa e kishim fituar betejën e fundit kur ra tërmeti dhe treguam që s’ishim nga ata që duken një herë në 4 vjet. Jemi forca politike që quhet Partia Socialiste, edhe kur ka shi, edhe kur ka diell, edhe kur ka tërmet, edhe kur ka pandemi, edhe kur jemi shëndoshë e mirë sepse një familje është gjithmonë bashkë dhe kjo është familja jonë”
Kryebashkiaku theksoi se vota për PS është shumë e rëndësishme në 14 Maj, pasi nevojitet për të vijuar me investimet e medha, ndër të cilat Unaza e Madhe e Tiranës.
“Sot jemi në një situatë ku kemi shumë punë që i kemi nisur dhe i kemi në gjysmë të rrugës. Ashtu si një njëri që ndërton çatinë e vet, nuk ndërton vetëm gjysmat e tjegullave, duhet të mbarojë e gjithë çatia. Ashtu si dikush që lyen murin, nuk lyen vetëm gjysmën e murit, duhet të lyejë të gjithë murin. Ashtu edhe Tirana jonë, e ka nisur mbarë, por siç kemi bërë gjysmën e Unazës së Madhe nga sheshi Shqiponja deri në Farkë të Madhe, tani duhet të kalojmë te zonat e Xhemalit, të vijë Unaza në Dajt, në Tufinë, e të vazhdojë derisa të dalë në Paskuqan”
I pranishëm në takim ishte edhe deputeti i PS, Xhemal Qefalia, i cili u shpreh se për të gjitha ato që janë bërë dhe që do bëhen në këto zona, duhet një tjetër mandat për Erion Veliajn.
