Malajzia planifikon të ndalojë mediat sociale për personat nën 16 vjeç nga viti 2025, duke shtuar emrin e saj në listën e vendeve që miratojnë rregulla më të rrepta për të mbrojtur të miturit online.
Ministri i Komunikimit Fahmi Fanjil tha të dielën se qeveria po shqyrton modelet e përdorura në Australi dhe vende të tjera mbi kufizimet e moshës. Ai tha se qëllimi është të mbrojë të rinjtë nga rreziqe të tilla si ngacmimi online, mashtrimet financiare dhe abuzimi seksual i fëmijëve.
“Shpresojmë që brenda vitit të ardhshëm, platformat do të zbatojnë vendimin e qeverisë për të ndaluar llogaritë për përdoruesit nën 16 vjeç,” u tha ai gazetarëve në një video të publikuar nga gazeta lokale The Star.
Debati mbi ndikimin e mediave sociale në shëndetin mendor dhe fizik të fëmijëve po intensifikohet ndërkombëtarisht. Në SHBA, kompani të mëdha si TikTok, Snapchat, Google dhe Meta po përballen me padi për rolin e tyre në përkeqësimin e shëndetit mendor të të rinjve.
Ndërkohë, Australia po përgatitet të çaktivizojë llogaritë e përdoruesve nën 16 vjeç muajin e ardhshëm, ndërsa vende si Franca, Spanja, Italia, Danimarka dhe Greqia po testojnë së bashku teknologjitë e verifikimit të moshës.
Në vitet e fundit, Malajzia ka rritur mbikëqyrjen e platformave dixhitale për shkak të rritjes së përmbajtjes si lojërat e fatit të paligjshme në internet dhe postimet që prekin çështje të racës, fesë dhe familjes mbretërore. Në fakt, që nga janari, platformat dhe shërbimet e mesazheve me më shumë se 8 milionë përdorues duhet të marrin një licencë për të vepruar sipas një rregulloreje të re. /tesheshi.com/