Senati i SHBA-së hodhi poshtë të martën një rezolutë që ndalonte shitjen prej 650 milionë dollarësh të 280 raketave të avancuara me rreze të mesme veprimi në Arabinë Saudite.
Rezoluta, e paraqitur nga republikanët Rand Paul dhe Mike Lee dhe demokrati Bernie Sanders, u refuzua nga 67 dhe u pranua nga 30 senatorë.
Megjithëse disa ligjvënës e shohin Arabinë Saudite si një partner të rëndësishëm në Lindjen e Mesme, anëtarët e Kongresit kanë kritikuar mbretërinë për luftën në Jemen, një konflikt i konsideruar si një nga fatkeqësitë më të mëdha humanitare në botë.
“Eksporti i raketave shtesë në Arabinë Saudite vetëm sa do të vazhdojë këtë konflikt dhe do t’i shtojë benzinë zjarrit,” tha Sanders në një fjalim duke bërë thirrje për mbështetje për rezolutën.
Shtetet e Bashkuara do t’i shesin Arabisë Saudite 280 raketa ajër-ajër të prodhuara nga Raytheon Technologies.
Qeveria e presidentit amerikan Joe Biden njoftoi më herët të martën se e kundërshton fuqishëm rezolutën, raporton Reuters.
Miratimi “do të minonte angazhimin e Presidentit për të ndihmuar në mbrojtjen e partnerit tonë në një kohë të rritjes së sulmeve me dronë dhe raketa ndaj civilëve në Arabinë Saudite“, tha Shtëpia e Bardhë në një deklaratë. /teshesh.com/
