EMISIONI VETTING
Lidhjet e drejtorëve të zv.kryeministres Balluku me biznesmenët më të fuqishëm në vend nuk janë një rastësi. Drejtoreshat në Ministrinë e Infrastrukturës, Erjola Muka dhe Irena Malolli rezultojnë të lidhura indirekt me biznesmenin Besnik Leskaj, që ka kontratë koncesioni me Ministrinë e Infrastrukturës dhe mund të përfitojë nga vendimet apo mund të monitorohet nga njësi të varura nga këto të fundit.
Prej gati 3 vitesh Erjola Muka është Drejtoreshë e Përgjithshme e Politikave dhe Zhvillimit të Infrastrukturës dhe Territorit në Ministrinë e Infrastrukturës dhe më përparë ka punuar administratore e kompanisë publike “Albpetrol” sha, po në varësi të Ministrisë së Infrastrukturës.
Ndërkohë bashkëshorti i saj, Redion Biba rezulton administrator i kompanisë “ABKONS” shpk në pronësi të kompanisë “Blessed Investment” e biznesmenit Besnik Leskaj dhe Redjan Bashës.
Nga ana tjetër, prej shumë vitesh Irena Malolli është Drejtoreshë e Politikave dhe Strategjive të Zhvillimit të Telekomunikacionit dhe Postave në Ministrinë e Infrastrukturës dhe rezulton bashkëshortja e Sokol Malollit. Ky i fundit ka qenë i punësuar pranë kompanisë “ABKONS” shpk dhe si drejtor pranë kompanisë “IKONS”, edhe kjo në pronësi të Besnik Leskaj si aksioner kryesor dhe 25% të aksioneve në zotërim të Josif Gjanit.
Sipas avokatit Arben Llangozi, çdo lloj veprimi apo kontrate që lidhet në dukje me konflikt interesi meriton një konflikt penal.
“Konflikti i interesit në vetvete udhëzon dhe është krijuar si ligj për të udhëzuar institucionet ligjzbatuese për të filluar një hetim“, tha për “Vetting” avokati Llangozi.
Por Erjola Muka dhe Irena Malolli janë anëtare të shoqërisë publike “Hekurudha Shqiptare Sha” si përfaqësuese të Ministrisë, ndërkohë që familjarët e tyre janë drejtues te kompanitë “ABKONS” dhe “IKONS” të biznesmenit Leskaj që ka aksione te koncesioni i hekurudhës.
Ajo që ngre dyshime për konflikte interesi me detyrën është kontrata koncesionare e fituar nga vëllezërit Leskaj dhe “ALB-STAR” për rehabilitimin, operimin dhe transferimin e rrjetit të transportit hekurudhor në linjat Fier-Ballsh dhe Fier-Vlorë.
Kontrolli i Lartë i Shtetit ka publikuar një raport, ku zbulohet se kompania koncesionare ka shkelur kushtet e kontratës. Realizimi i kontratës ka ngelur mbrapa me afatet dhe kjo ka sjellë probleme, ku evidentohet se Ministria e Infrastrukturës që drejtohet nga Balluku nuk ka ngritur grupin e Njësisë së Zbatimit të Projektit.
Sipas avokatit Arben Llangozi, konflikt interesi nuk është vetëm momenti i fitimit të një prokurimi publik, por është edhe kur të gjithë zbatimin e një kontrate e cila në rastin konkret, siç e ka konstatuar edhe Kontrolli i Lartë i Shtetit është një kontratë e cila nuk është zbatuar plotësisht.
Kjo kontratë, ashtu si edhe kontratat për dy parqet fotovoltaike të vëllezërve Leskaj, që po ndërtohen në zonën e Semanit në Fier janë firmosur dhe monitorohen nga Ministria e Infrastrukturës dhe Energjisë.
Sipas auditit nga Kontrolli i Lartë i Shtetit, në Ministrinë e Infrastrukturës të treja këto kontrata kanë patur probleme me zbatimin dhe dokumentet duke ngritur dyshime për favorizim nga institucioni që drejtohet nga Belinda Balluku.
Në mars 2023, Fondi Green for Growth (GGF), i cili mbështetet nga Banka Europiane për Rindërtim dhe Zhvillim, Bashkimi Europian dhe Banka Gjermane e Frankfurit KFW miratoi një hua prej 28 milionë eurosh për ndërtimin dhe funksionimin e termocentralit diellor “SPV Blue “1 në Fier, duke financuar 75% të projektit. Në qershor 2023, Enti Rregullator miratoi kalimin e pasurive të paluajtshme të kompanisë “SPV Blue 1” në favor të fondit “Green for Grovvth”.
Në Seman, kompanitë e vëllezërve Leskaj kanë përfituar sipërfaqe të mëdha toke për zhvillimin e këtyre projekteve, por Besnik Leskaj rezulton bashkëshorti i Ledia Totaj, e cila deri në nëntor 2023 për gati 7 vite ka qenë zyrtare e lartë si drejtuese e Agjencisë së Zhvillimit të Territorit.
Përfitimi i lejeve për parqet fotovoltaike apo edhe për zona të caktuara ka ngritur pikëpyetje për favorizime pasi ka qenë vet Kontrolli i Lartë i Shtetit, që ka konstatuar probleme me kontratat për parqet fotovoltaike.
Nga ana tjetër, duke qenë se Besnik Leskaj është person i lidhur me Ledia Totaj, automatikisht është subjekt i Inspektoratit të Lartë të Deklarimit dhe Kontrollit të Pasurive dhe Konfliktit të Interesave.
Sipas avokatit Redi Ramaj, personi i lidhur në kuptimin që i jep ligji për deklarimin e pasurive, raporton njësoj dhe deklaron njësoj si personi i cili është subjekti deklarues.
“Tregon të dhënat e pasurisë, lidhjet e tij me biznesin, çfarë gjeneron në vitin në të cilin po deklaron, pra çfarë pasurie ka gjeneruar”, u shpreh avokati Ramaj.
Nga informacionet e siguruara nga “Vetting”, Leskaj ka deklaruar vetëm në vitin 2017 themelimin e degës së kompanisë “IKONS GLOBAL LIMITED” në Angli, por në vazhdim nuk ka deklaruar të ardhurat dhe shpenzimet me këtë kompani apo lëvizjen e aksioneve.
Por Besnik Leskaj është aksioner te kompania në Angli, nëpërmjet një dege të kësaj kompanie që e ka themeluar në 2018, në offshoret e Maltës, e cila është një parajsë fiskale për biznesmenët që duan të fshehin pasuritë e tyre.
Edhe në këtë rast, kjo kompani e cila zotëron aksione te kompania në Angli nuk është deklaruar në ILDKPKI nga Leskaj.
Nga dokumentet zyrtare, kjo kompani guackë është në pronësi të një kompanie tjetër malteze “Blessed Investment Limited”, e cila ka si pronar fundor kompaninë shqiptare “Blessed Investment” shpk. Kjo kompani është aksionere drejtpërdrejt te kompanitë e parqeve fotovoltaike, te kompania “IKONS” dhe “ABKONS” shpk, ku kjo e fundit ka marrë fonde nga Autoriteti Rrugor Shqiptar.
Sipas avokatit Ramaj, rreziku në mosdeklarimin e këtyre të dhënave është vepër penale, është falsifikim i stampave, formularëve që përfshihen nga Kodi Penal si vepër penale dhe rrezikon cdo zyrtar në momentin e mosdeklarimit apo deklarimit të rremë në këto formularë të ndiqet penalisht nga prokuroria.
Në mars 2021 “IKONS” shpk së bashku me kompaninë italiane “BGP Management Consulting” spa do të përfitonte tenderin me vlerë 1 milion euro ose 107 milionë lekë për “Implementimi i aplikimeve dhe funksioneve ERP në KESH sh.a – moduli i menaxhimit financiar dhe moduli i menaxhimit të burimeve njerëzore” nga Korporata Elektroenergjitike Shqiptare Tiranë. Edhe kjo garë do të shënohej me flamur të kuq, pasi do të skualifikoheshin të gjithë konkurrentët duke u shpallur konsorciumi i kompanive italo-shqiptare fitues.
Për tenderin pati ankesa, të cilët u refuzuan nga administratori Besjan Kadiu.
LEXO EDHE: A duhet hetuar për falsifikim Belinda Balluku?! Vetting ‘zbërthen’ arsimin e dyshimtë të ministres së Infrastrukturës! Diplomë 2-vjeçare në SHBA, por deklaron se qëndruar vetëm 1 muaj në Angli
Vetting: Burri i drejtoreshës së Ballukut fiton tenderin e majmë! Zv.ministrat Ceno Klosi dhe Ami Kozeli në krye të Këshillit të OSHEE, si e “eliminuan” konkurrentin! 13 milionë euro vetëm nga AKSHI
Skandali, Belinda Balluku i dha koncesionin e rëndësishëm firmës së babait të administratorit të OSHEE! E firmosi zv.ministri, e ‘vulosi” vetë si zv.kryeministre! Mish-mashi me Bordet e energjisë
