ELBASAN- Në qarkun e Elbasanit gjatë një aksioni antidrogë kanë rënë në pranga 30 persona, 14 të tjerë të janë shpallur në kërkim, ndërsa 1 person është vënë në hetim.
Policia ka publikuar pamjet e aksionit gjatë bastisjeve të banesave dhe arrestimit të personave të skeduar për trafikim lëndësh narkotike.
Gjatë këtij operacioni janë sekuestruar sasi lënde narkotike kokainë dhe kanabis, armë zjarri pistoletë dhe kallashnikov, armë gjahu, sasi e konsiderueshme municioni luftarak, peshore elektronike, thika, përforcues grushti, steka duhani të dyshuara të kontrabanduara, laptop, tablet, DVR, targa automjetesh (shqiptare dhe belge), shuma parash në euro, paund, dollar, franga zviceriane dhe 24 celularë.
Sipas policisë, nga hetimi u dokumentua aktiviteti kriminal i këtyre shtetasve, të përfshirë në veprimtari kriminale në fushën e shitjes dhe shpërndarjes së lëndëve narkotike, të cilët vepronin në mënyrë të organizuar në grupe të vogla ose individualisht, në të gjithë qarkun Elbasan.