Real Madrid bën një hap të madh drejt kualifikimit në çerekfinale të Champions League.
Në “Santiago Bernabeu”, “Los Blancos” iu imponuan Manchester City të Pep Guardiolës, duke e mundur me rezultatin 3-0, me protagonist absolut Federico Valverden.
Pjesa e parë ishte thjesht perfekte për Realin e Madridit, që e mbylli atë me rezultatin 3-0.
Valverde ishte i papërmbajtur në këto 45 minuta të para, me uruguaianin që shënoi të tre golat për madrilenët.
Valverde e nisi spektaklin e tij në minutën e 20, kur zhbllokoi rezultatin për skuadrën e Real Madrid, një gol që ishte një goditje e rëndë për Manchester City, i cili 7 minuta më vonë u ndëshkua sërish nga Valverde pas një asisti të Vinicius, dhe rezultati shkoi në 2-0 për skuadrën merenges.
Por telashet për “Citizens” nuk u mbyllën këtu, sepse në minutën e 42 Valverde plotësoi tregolëshin personal, duke e çuar rezultatin në 3-0 për Realin.
Në fillimin e pjesës së dytë, Real Madrid fitoi një 11-metërsh, por Vinicius gaboi nga pika e bardhë pasi Donnarumma e priti gjuajtjen e tij, me brazilianin që humbi shansin për të zhytur edhe më thellë skuadrën e Guardiolës.
https://www.youtube.com/watch?v=4qglPieuFU4
Kështu Reali hedh një hap të sigurt në çerekfinale, ndërsa City do të kërkojë një mrekulli pas një jave në “Etihad”.