Ka nisur sot në Berat, ashtu si në të gjithë vendin vaksinimi masiv i qytetarëve.
Gazetarja Eneida Petova raporton për “Balkanweb” se burimet zyrtare pranë NJVKSH Berat bëjnë me dije se kanë mbërritur pranë këtij institucioni një sasi e konsiderueshme dozash të vaksinës kineze Sinovax, të cilat janë të mjaftueshme për të vijuar vaksinimin masiv.
Vaksinimi ka nisur që prej orës 09:00 në të 14 Qendrat Shëndetësore të Beratit dhe Urës-Vajgurore, ku po vijon vaksinimi i moshave mbi 70 vjeç.
Që prej orës 09:00,kur edhe u hapën dyert për fillimin e këtij proçesi qyetarët janë dyndur në Qendrat Shëndetësore të lagjeve përkatëse për të marrë dozën e parë të vaksinës kineze.
Vaksinimi po vijon me ritme të kënaqshme dhe deri tani janë vaksinuar rreth 700 qytetarë, ndërkohë që proçesi i vaksinimit për ditën e sotme do të mbyllet në orën 17:00 në të gjitha Qendrat Shëndetësore.
Sipas drejtuesve të Njësisë Vendore të Kujdesit Shëndetësor në Berat,vaksinimi po kryehet sipas çdo rregulli dhe pa probleme nga vaksinatorë të kualifikuar e të trajnuar për këtë proces.
