Kreu i Prokurorisë së Posaçme (SPAK), Altin Dumani, ka raportuar këtë të hënë, 27 tetor, në Kuvend ku iu përgjigj pyetjeve të deputetëve, përfshirë edhe ato lidhur me vizitën e tij në Shtetet e Bashkuara të Amerikës. Dumani e cilësoi këtë vizitë si një nga më të rëndësishmet e zhvilluara deri më tani, duke theksuar se është vlerësuar bashkëpunimi i SPAK me autoritetet amerikane, veçanërisht në fushën e luftës kundër trafikimit të lëndëve narkotike.
Ai sqaroi gjithashtu se kjo vizitë nuk ka lidhje me takimin e tij në Malin e Zi, duke theksuar se marrëdhëniet me autoritetet malazeze janë shumë të mira dhe se hetimet kanë zbuluar bashkëpunime mes grupeve kriminale të dy vendeve, kryesisht në trafikimin e kokainës. Dumani theksoi se tashmë janë ngritur ura të forta komunikimi dhe bashkëpunimi të përbashkët në luftën kundër krimit të organizuar.
“Vizita në Departamentin e Shtetit është një ndër më të mirët që kam realizuar. Është vlerësuar bashkëpunimi i SPAK me Shteteve të Bashkuara të Amerikës, me fokus të veçantë atë të trafikimit të lëndëve narkotike. Por, kjo vizitë nuk ka të bëjë fare me takimin tim në Malin e Zi. Me Malin e Zi kemi një bashkëpunim shumë të mirë. Hetimet kanë treguar që grupet tona kriminale të vendit tonë bashkëpunojnë me ato të Malit të i sidomos në trafikimin e kokainës. Tashmë kemi vendosur ura komunikimi dhe të një bashkëpunimi të vetëm që është lufta kundër krimit të organizuar”, tha Altin Dumani.
