Policia ka sekuestruar armën dhe makinën e përdorur nga Habib Rexha, në vrasjen e Arjan Gosës, ngjarje e ndodhur pak ditë më parë në Kavajë.
Arma e sekuestrua pas dëshmisë së dhënë nga Rexha para grupit të hetimit, i cili tha se pistoletën e kishte hedhur në afërsi të pistës “Iliria” në Durrës.
Ndërkaq, edhe automjeti i përdorur nga Rexha është gjetur po në Durrës.
31-vjeçari Rexha ka dhënë dëshminë e tij para grupit të hetimit, ku tha se se vrasjen e ka kryer pasi ai dhe familja e tij ndiheshin të kërcënuar.
Sipas tij, viktima Arjan Gosa kur ishte kthyer nga Italia ishte shprehur se do ta shuante familjen Rexha.
“Une jam autori i vrasjes së Arjan Gosës. Vrasjen nuk e kam kryer për gjakmarrje, por për arsye se Arjani kur ishte kthyer nga Italia është shprehur se do ta na shuante si familje. Kësaj, unë i bëra parapritë. Sa të na vriste ai neve, pashë të udhës ta vrisja unë i pari. Vëllezërit e mi dhe babai nuk kishin fare dijeni. E dija qe Arjani pinte kafe te lokali pranë shtepisë së tij. Shkova e qëllova dhe më pas u largova në drejtim të Durrësit. Pistoletën e hodha në afërsi të pistës Iliria në Durrës tek ca gurë”,- ka deklaruar ndër të tjera Habib Rexha./
