Aplikimi i Kosovës për anëtarësim në Bashkimin Europian nuk është pritur mirë nga Beogradi zyrtar.
Në një reagim në rrjetet sociale presidenti serb ka pyetur Perëndimin se cilat nga marrëveshjet e nënshkruara për Kosovën duan që të respektohet.
ALEKSANDËR VUÇIÇ
PRESIDENTI SERB
Një pyetje e thjeshtë për partnerët tanë perëndimorë, cilin nga pesë dokumentet e rëndësishme duan të respektojnë? Marrëveshjen e Kumanovës, Kartën e OKB-së, Rezolutën 1244, Marrëveshjen e Brukselit apo Marrëveshjen e Uashingtonit? Arrita në dokumentin e gjashtë shumë të rëndësishëm të BE-së nga viti 2003, dokumenti i famshëm i Selanikut për zgjerimin e BE-së. Dhe pikërisht në ditën e paraqitjes së kërkesës për anëtarësim në BE të të ashtuquajturës Kosovë, pyetja ime është nëse do t’i respektojnë dokumentet që i kanë sjellë vetë, sepse në pikën 5 të dokumentit të Selanikut thuhet se e mbështesin plotësisht zbatimin e Rezolutës 1244. Pra, pyetja ime sot është cilin nga këto gjashtë dokumente dëshironi të respektoni dhe ne do të pajtohemi absolutisht.
Komentet e Vuçiç i bëri pak para takimit të tij me përfaqësuesin e Bashkimit Europian për dialogun Kosovë-Serbi, Miroslav Lajçak, dhe të dërguarin e SHBA për Ballkanin Perëndimor, Gabriel Escobar.
Në fokus të takimit pritet të jetë situata në Veri të Kosovës ku serbët kanë bllokuar me barrikada rrugët.
