Presidenti i Serbisë, Aleksandar Vuçiç, ka theksuar se situata në veri të Kosovës, është komplekse dhe po bëhet gjithnjë e më e vështirë, veçanërisht në spitalin e Mitrovicës së Veriut.
Në reagimin e tij presidenti Vuçiç ka thënë se vështirësitë më të mëdha të furnizimit në atë pjesë janë për shkak të taksës së vendosur nga Prishtina, ndaj mallrave nga Serbia dhe Bosnje e Hercegovina.
Duke komentuar hapjen e pikave të shitjes nga ana e autoriteteve të Prishtinës, pasi për dy ditë me rradhë, afaristët serbë i mbyllen dyqanet, presidenti serb tha se kjo është bërë me qëllim që “serbët të harrojnë lidhjen me atdheun e tyre”.
“Objektivi kryesor i këtyre masave të Prishtinës, është ta marrë veriun e Kosovës, dhe të dëbojë popullsinë serbe nga mbarë Kosova”.
Të hënën, afaristët serbë në veriun e Kosovës, i mbyllën dyqanet pasi thanë se nuk posedojnë furnizim me mallra, për shkak të taksës 100 për qind të vendosur nga autoritetet në Prishtinë për mallrat nga Serbia.
Qeveria e Kosovës më pas vendosi të hapë pika të shitjes mobile për banorët e asaj pjese.
Gjatë një takimi të martën në mbrëmje, të Shoqatës së Afaristëve të veriut, u vendos që të mërkurën të hapen gjitha pikat e shitjes në veri.
