Ambasadorja amerikane në Shqipëri Yuri Kim foli në një prononcim për mediat pas takimit me drejtorin e ri të “Bluve” Gledis Nano.
Diplomatja amerikane theksoi se është me rëndësi besimi i publikut te Policia dhe rritja e integritetit. Po ashtu Yuri Kim theksoi se është me rëndësi që ligjzbatimi të mbetet i ruajtur nga çdo lloj ndikimi që vjen nga jashtë.
“Pata një takim shumë të mirë me z. Nano. Erdha për ta takuar dhe përgëzuar për pozicionin e ri. Gjithashtu, rikonfirmova se bashkëpunimi i fortë SHBA-Shqipëri për çështjet e ligjzbatimit mbetet i rëndësishëm.
Do të vazhdojmë të japim mbështetje duke filluar nga pajisjet në trajnime dhe çfarëdo lloj ndihme tjetër. Diskutuam rëndësinë që Policia të ruajë dhe të rrisë besimin e publikut në integritetin e tyre. Z. Nano dhe unë jemi mbështetës së fortë të prezencës së policisë.
E dimë që Policia e Shtetit ndërmerr rreziqe të mëdha, duke humbur edhe jetën për të ruajtur ligjin edhe rendin. Gjithashtu diskutuam rëndësinë se si ligjzbatimi të mbetet i ruajtur nga çdo lloj ndikimi që vjen prej jashtë”, tha Yuri Kim.
