Kryeministri grek Kyriakos Mitsotakis ka shprehur gatishmëri që Greqia të furnizojë Maqedoninë e Veriut dhe Shqipërinë me vaksinën e COVID-19.

Lajmin e ka bërë të ditur kryeministri i Maqedonisë së Veriut, Zoran Zaev.

“Mitsotakis shprehu gatishmëri që Greqia, si një anëtare e BE-së, të kërkojë që furnizimi i vaksinave në Maqedoninë e Veriut dhe Shqipërinë të kalojë përmes saj, sepse zakonisht, vendet anëtare shkojnë së pari, dhe më pas kandidatët.

Nëse mund të organizohet për ne 15 deri në 20 ditë përpara, atëherë kjo është e mirëseardhur”, tregoi Zaev, në një intervistë për Mia. mk.

Duke folur për tema të tjera të takimit të tij me Mitsotakis në Athinë dje, Zaev tha se ata kishin rënë dakord të zhvillonin një sesion të dytë ndërqeveritar për dimrin, mundësisht deri në fund të vitit dhe më pas të nënshkruanin një marrëveshje për të shmangur taksimin e dyfishtë.

“Ne mbajtëm seancën e parë në Shkup, me (ish-kryeministrin grek Alexis) Tsipras. Tani ne do të organizojmë të dytën në Athinë, ku duhet të nënshkruajmë një marrëveshje për shmangien e taksimit të dyfishtë, i cili do të hapë një fushë të madhe për investime greke, për kompani shumëkombëshe me origjinë greke”, tha Kryeministri i Maqedonisë së Veriut.

Subscribe kanalin tonë në Youtube për të mos humbur asnjë video të re