Kathleen Ann Kavalec, do të jetë ambasadorja e re amerikane në Shqipëri.
Emri i saj është propozuar nga Presidenti Donald Trump, ndërsa pritet që Senati ta miratojë këtë propozim.
Kavalec do të zëvendësojë ambasadorin Donald Lu, të cili i mbaron mandati në Shqipëri për t’u transferuar në Kirgistan.
Me një përvojë 30 vjeçare në fushën e diplomacisë, aktualisht Kavalec shërben si Zëvendës Ndihmës Sekretare në Zyrën e Çështjeve Evropiane dhe Euroaziatike në Departamentin e Shtetit.
Ndërkohë më parë ajo ka shërbyer si Drejtoreshë e Zyrës së Çështjeve të Rusisë, Zëvendës Shefe e Misionit të SHBA në UNESCO në Paris, Zëvendës Koordinatore e Ndihmës në Zyrën e Çështjeve Evropiane dhe Drejtore për Parandalimin e Konflikteve në Zyrën e Koordinatorit për Rindërtimin dhe Stabilizimin.
Zonja Kavalec ka mbaruar Universitetin e Kalifornisë në Berkeley dhe ka një master nga Universiteti Georgetown.
Ambasadorja e re e SHBA-ve gjithashtu flet rrjedhshëm gjuhët frënge, rumune, ukrainase, ruse, spanjolle dhe portugeze.
