Zëdhënësi i Presidentit të Republikës, Tedi Blushi, ka reaguar me ironi ndaj deklaratave që kryebashkiaku i Tiranës, Erion Veliaj bëri kundër kreut të shtetit gjatë ditës së sotme.
Në postimin e tij në Facebook, Blushi shprehet se një kryebashkiak si Veliaj mundet dhe nga personazhi i njohur, Ilir Vrenozi, ku sipas tij është pak të thuash se e bën ‘Marmalatë Fiku’.
Postimi i plotë i Tedi Blushit:
“Të na falë Ilir Vrenozi, por fitorja e tij ndaj Lali Fikut është e padiskutueshme. I favorizuar nga emri, integriteti dhe popullariteti, “buldozeri” Vrenozi është pak të thuash se e bën Marmalatë Fiku. Pranoji transferimin e gjendjes civile në Tiranë dhe përballu me të, po je buRë!”, shkruan Tedi Blushi.
Ditën e sotme Kryebashkiaku Erion Veliaj deklaroi se Presidenti Meta ka dalë jashtë kornizës së tij kushtetuese.
“Është një gjuhë e padenjë për një president, presidenti Moisiu nuk do fliste kurrë kështu. T’i thuash kundërshtarit buburrec, është fjala që përdornin në gjenocidin “Hutu dhe Tutsi” (Ruanda), pra në pragun e gjakderdhjes më të madhe të kohëve moderne, një palë i thoshte palës tjetër buburrec. Kështu që ky është një fjalor i padenjë, një fjalor përçarës dhe është jashtë kornizës së presidentit, duhet të jetë aty si uniteti kombëtar, jo si përçarësi kombëtar. Meta ka humbur fokusin, merret me Astirin, Teatrin, president që do të bëjë punët që janë poshtë tij s’kisha parë. Më shumë do të japë mend për punët e tjerëve, se për atë që është caktuar. Gjuha përçarëse, fyese, nuk i shkon Metës. Hajde garo për kryetar Bashkie dhe të shohim kush është më i mirë “, tha Veliaj.
