Bashkimi Evropian shpall masa të forta dhe proporcionale në përgjigje të tarifave prej 25% të Trump për çelikun dhe aluminin.
Ditët e fundit, tregtia ndërkombëtare ka qenë në qendër të tensioneve në rritje, me tarifat e vendosura nga Trump duke shkaktuar zemërim në BE. Politikat proteksioniste nga disa vende kanë pasur pasoja globale, duke rrezikuar stabilitetin ekonomik dhe marrëdhëniet diplomatike. Ndër sektorët më të prekur, ai metalurgjik është kthyer në një qendër nervore mosmarrëveshjesh mes fuqive të mëdha ekonomike.
Masat tarifore të vendosura nga Shtetet e Bashkuara
Tarifat dhe detyrimet e importit mund të ndikojnë në faktorë të ndryshëm ekonomikë: nga industritë prodhuese te konsumatorët përfundimtarë, duke përfshirë kompanitë eksportuese. Kur një vend vendos barriera tregtare, kjo shpesh rezulton në përgjigje proporcionale nga partnerët e përfshirë, duke shkaktuar luftëra tregtare me efekte të paparashikueshme.
Në këtë skenar, Shtetet e Bashkuara njoftuan vendosjen e tarifave 25% për importet e çelikut dhe aluminit, me një datë efektive më 12 mars 2025. Vendimi u zyrtarizua përmes një urdhri ekzekutiv të nënshkruar nga presidenti Donald Trump.
Në deklaratën zyrtare, Trump shpjegoi arsyet e masës, duke nënvizuar se është një vendim që synon mbrojtjen e industrisë kombëtare:
“Kam vendosur që importet e produkteve të çelikut nga këto vende kërcënojnë sigurinë kombëtare dhe kam vendosur që është e nevojshme të ndërpriten këto marrëveshje nga 12 marsi 2025.
Përveç tarifave të çelikut dhe aluminit, Trump zbuloi në një intervistë me Fox News se po punon për tarifa të reja të mundshme për automobilat, produktet farmaceutike dhe çipat kompjuterikë.
Reagimi i Bashkimit Evropian
Bashkimi Evropian, një eksportues kryesor i çelikut dhe aluminit në Shtetet e Bashkuara, u përgjigj shpejt. Presidentja e Komisionit Evropian Ursula von der Leyen shprehu kundërshtim të fortë ndaj vendimit amerikan, duke deklaruar:
“Më vjen thellësisht keq për vendimin e Shteteve të Bashkuara për të vendosur tarifa për eksportet evropiane të çelikut dhe aluminit. Tarifat janë taksa: të këqija për bizneset, më keq për konsumatorët. Tarifat e pajustifikuara kundër BE-së nuk do të mbeten pa përgjigje: ato do të shkaktojnë kundërmasa të forta dhe proporcionale. BE-ja do të veprojë për të mbrojtur interesat e saj ekonomike. Ne do të mbrojmë punëtorët tanë, bizneset tona dhe konsumatorët tanë”.
Komisioneri Evropian për Tregtinë, Maroš Šefčovič, gjithashtu përsëriti qëndrimin e Brukselit kur, duke folur në Parlamentin Evropian, deklaroi:
“Nuk ka asnjë justifikim për tarifat e Trump, ne e kunërshtojmë këtë vendim. Me tarifat do të rritet inflacioni dhe ato janë taksë për qytetarët e tyrë . Një skenar në të cilin të gjithë humbasin: ne do të përgjigjemi ashpër dhe proporcionalisht, do të mbrojmë punëtorët dhe kompanitë tona”.
Fjalët e Komisionit Evropian nuk lënë vend për dyshime: BE-ja është e gatshme të marrë masa hakmarrëse për të mbrojtur tregun dhe bizneset e saj. Mbetet për t’u parë se çfarë kundërmasash do të merren dhe çfarë ndikimi do të ketë ky përshkallëzim i ri në marrëdhëniet mes dy palëve të Atlantikut. Siç raportohet nga ilsole24ore.com