Ndonëse na ndajnë katër muaj nga zgjedhjet vendore të 30 qershorit, kandidati zyrtar i PS-së për Bashkinë Berat, Ervin Demo, vijon takimet me grupe të ndryshme shoqërore, për të dëgjuar hallet dhe problematikat që kanë në lagjet e tyre.
Ai është ndalur në lagjen “Kushtrim” dhe “Donika Kastrioti” të Rajonit Nr. 3, ku ka bashkëbiseduar me banorët e këtyre lagjeve dhe është njohur më nga afër me shqetësimet e tyre.
“Shërbime të munguara dhe një lagje e lënë totalisht në harreë. Detyra jonë, rikthimi i vëmendjes tek ju.” – shkruan Demo në fotot bashkëlidhur këtyre takimeve në profilin e tij zyrtar.
Këto takime vijnë pas disa dëgjesave publike me banorë të lagjes “Çlirim” dhe “Dëshmorët e Kombit”, ku, mes të tjerash, Demo është shprehur: “Privilegj të jem krahë për krahë me ju dhe mëse i bindur që çdo sfidë së bashku është e mundur”.
Mësohet se Demo është duke zhvilluar dëgjesa dhe takime me të gjithë banorët e lagjeve të ndryshme të Beratit dhe të Njësive Administrative, shqetësimet dhe propozimet e të cilëve pritet t’i pasqyrojë edhe në programin e tij elektoral për zgjedhjet vendore, ndërkohë që një grup pune me specialistë të fushave të ndryshme është ngritur për ta bërë sa më parë realitet dhe të prekshëm këtë program.