Këshilltari për Sigurinë kombëtare pranë Partisë Demokratike, Xhemal Gjunkshi, ka reaguar për zjarrin që shkrumbi thuajse plotësisht një pallat në zonën e 21 Dhjetorit, ditën e sotme në Tiranë.
Në reagimin e tij, Gjunkshi shkruan se siguria e jetës dhe e pronës së qytetarëve është në rrezik, ndërsa shton se situata e krijuar “mund të ishin kthyer në një tragjedi për disa familje”.
Më tej Gjunkshi u ndal edhe te infrastruktura e pallateve, ku tha e “siguria e komunitetit nuk ka lidhje vetëm me rendin por dhe me përballjen e fenomeneve natyrore dhe shkaqeve njerëzore si, zjarret, përmbytjet, tërmetet”.
“Shteti nuk është vetëm autoritet taksambledhës por mbi të gjitha garantues i jetës së qytetarëve të vet”, tha ai.
Postimi i plotë:
Siguria e jetës dhe e pronës së qytetarëve rrezikohet seriozisht nga zaptimi i çdo hapësire publike.
Flaket e mëdha që përfshinë sot një pallat në Tiranë, mund të ishin kthyer në një tragjedi për disa familje. Falë Zotit gjithcka kaloi vetëm me pasoja të mëdha materiale. Së pari vlerësim dhe respekt për trupat zjarrfikëse për punën vetëmohuese, ku dy prej punonjësve patën dhe lëndime.
Por përtej lajmit, ngjarja është e rëndë dhe duhet patjetër të ngjallë një reflektim të thellë dhe reagim të shpejtë të strukturave të bashkisë dhe institucioneve përkatëse qendrore. Kushtet e infrastrukturës që gjenden shumë pallate banimi në Tiranë, janë më tepër se problematike.
Distancat shumë të ngushta të ndërtesave me njëra tjetrën, mungesa e theksuar e rrugës së lirë për automjetet e shpëtimit, mungesa e mjeteve të sigurisë brenda pallatit, si dhe logjistikës specifike të zjarrfikëseve janë disa nga problemet më të dukshme, por çështja duhet trajtuar shumë më thellë.
Siguria e komunitetit nuk ka lidhje vetëm me rendin por dhe me përballjen e fenomeneve natyrore dhe shkaqeve njerëzore si, zjarret, përmbytjet, tërmetet etj. Dhe shteti ynë ka dëshmuar jo pak dështime në këtë drejtim. Shteti nuk është vetëm autoritet taksambledhës por mbi të gjitha garantues i jetës së qytetarëve të vet.
Theksoj dhe një herë se, është shumë e rëndësishme dhe çështje serioze zbardhja e rrethanave dhe vënia para përgjegjësisë të kujtdo që me veprime dhe mosveprime të mëparshme ka shkaktuar zjarrin e sotëm.
Lusim Zotin të mos përsëriten më incidente të tilla.
