Vetëm një minutë larg… Pësimi i golit aq të vonë, e bën të dhimbshëm largimin e Holandës nga ky Europian.Mirëpo, me gjithë goditjen surprizë nga Uotkins, për skuadrën e Kuman ka vend për të listuar një sërë arsyesh për dështimin, veç finalizimit të parashikuar nga 28 vjeçari anglez.Holanda u shfaq me luhatje në Euro 2024. Paraqitje për t’u harruar në grupe. Një sinjal i mirë u dha me Rumaninë, teksa veç tre golave të shënuar krijoi të tjera raste. Përmbysja ndaj Turqisë u duk si një vazhdimësi e lojës së mirë dhe si rrjedhojë e një skuadre që po shtron terrenin për të prenotuar Berlinin. Mirëpo jo, gjithçka e mirë, u zbeh ndaj Anglisë. Dhe ajo perlë e hershme e Simons, ishte shumë pak.Kur vjen puna tek numrat, Holanda ka pësuar 1.5 gola për ndeshje. 9 gola të pësuar në 6 ndeshjet e një Europiani, janë relativisht shumë dhe ndikojnë për të mos arritur ndeshjen e shtatë dhe të shumëdëshiruar të një kompeticioni madhor.Gakpo shënoi tre gola.
Malen një dopietë ndaj Rumanisë, por nuk mjaftojnë. Me Depai në kërkim të vetvetes, Holanda e vuajti mungesën e një sulmuesi big, në formë, dhe që ti udhëhiqte. Pikërisht, në këtë pikë, halli bëhet i dyfishtë për Holandën, sepse krahas mungesës së sulmuesit, edhe forma e yjeve ka qenë e diskutueshme. Jo vetëm e Depait. Por edhe Gakpo, pikërisht ndaj Anglisë, atëherë kur duhet të ruante spaletat e liderit, u zhvesh nga çdo cilësi. Duke mos treguar asgjë.Dëmtimet në prag të Europianit lanë gjurmë, më shumë se kurrë u ndjenë ndaj Anglisë. Mungesat e De Jong apo të dyshes De Ron dhe Kopmejners lanë një gropë të madhe në mesfushën e portokallinjtë. Reparti që ndoshta e vuajti më së shumti edhe atë formë të Anglisë në pjesën e parë.Në fund, por ndoshta jo për nga rëndësia, sipas holandezëve por madje edhe vetë legjendave të futbollit Anglez, penalltia e akorduar me VAR ka krijuar debate. Dhe nëse e thonë legjenda si Nevill që ishte penallti skandaloze, atëherë, në Holandë ndoshta gjejnë shpagim për largimin nga ky Europian.
