Ish-kreu i ISHP-së dhe qendrës për kontrollin e barnave, Besnik Jakaj ka qenë i ftuar në studion e lajmeve të Fax News, ku ka kritikuar mënyrën e menaxhimit të pandemisë nga ana e qeverisë shqiptare. Jakaj tha se duhej të ishin hapur sa më parë spitalet rajonale, të cilat do të shfrynin ngarkesën që kanë sot spitalet Covid.
“Është e gjitha çështje menaxhimi, protokoll organizativ, nëse ne do të kishim hapur spitalet rajonale, pse ne duhet të sillnim një qytetar nga Kukësi në drejtim të Tiranës, apo nga Gjirokastra. Mjeku specialist do të bënte të mundur që të diferenconte pacientët, duke marrë në telefon 127, nëse duhej të bëhej transportimi i tyre drejt Tiranës”, u shpreh Jakaj.
Ai tha se lënia e mjekut të familjes jashtë skemës për trajtimin e rasteve Covid, ka sjellë pasoja në shëndetin e qytetarëve.
“Ne kemi lënë për katër muaj me radhë mjekun e familjes në skemë, që çështë e vërteta as sot nuk është përfshirë sa duhet. Mjekët duhet të jenë të pajisur me veshje profesionale për të pasur kontakt me pacientët. Duhet të ishte i gjithë zinxhiri i spitaleve për përballimin e Covid, sjellja në Tiranë e të gjithë pacientëve krijon vështirësi në informacion, krijon stërmundim për familjarët e tyre. Pacientët që e përballojnë keq kërkojnë trajtim spitalor, jo të gjithë të prekurit kanë nevojë për trajtime në spitale”, tha më tej Jahaj, që u ndal më pas edhe te menaxhimi i barnave.
Specialisti tha se situata në vendin tonë sa i takon barnave është jashtë kontrollit, ku ka abuzime të shumta me çmimet, por edhe me ilaçet që futen kontrabandë, pa u menaxhuar nga ana e shtetit.
“Ne jemi në një situatë totalisht jashtë kontrollit sa i takon barnave. Qeveria ka nxjerrë një paketë që nuk funksionon, nuk ka sistem kontrolli për barnat, po abuzohet me çmimet, po abuzohet dhe me recetat. Qytetarët shkojnë që të marrin receta të gatshme, duke u keqmjekuar, që mund të sjellin pasoja shumë të mëdha.
Ne kemi disa antivirale që qarkullojnë në vendin tonë dhe nuk janë të licensuar. Ka ilaçe që vijnë në kushtet e kontrabandës dhe shiten dhjetra herë më shtrenjtë. Në asnjë vend të botës nuk kushton një tampon 100 euro, antiviralët kanë shkuar deri në 700 euro në tregun e zi, apo antibiotikët që shiten të palincesuar“, deklaroi më tej Jakaj, ndërsa apeloi që Ministria e Shëndetësisë të hyjë sa më parë në treg.
(E.K/Faxweb.al)
/faxweb
