Një dyshe nga opozita, Spaho nga PD dhe Vasili nga LSI, dorëzuan në Prokurori një kallzim penal ndaj kryeministrit Rama. Ata, referuar fjalëve “horr” dhe “ndjekje këmba-këmbës”, që kryeministri i Rama i artikuloi në një qëndrim që mbajti ndaj deklarimeve të policit në arrati Emiljano Nuhu, kanë ndërmarrë aksionin politiko-ligjor ndaj shefit të qeverisë, pasi i konsiderojnë këto dy fraza si një kërcënim.
“Ai nëpërmjet këtij deklarimi ka ndërhyrë në hetim. Mbi Ramën rëndojnë 3 vepra penale, kanosje për shkak të detyrës, veprime për fshehjen e së vërtetës, dhe kanosjes për të mos kallëzuar. Këto shkelje dënohem me 2 deri në 4 vite burg”, thanë Spaho e Vasili.
Rama reagoi me moskokëçarje e ironi njëherësh.
Dy gjysmagjela të opozitës së shpërndarë më paskan kallëzuar në Prokurori në emër të heroit të filmit Babale. I falenderoj dhe plotësisht gati të hetohem, duke pritur me durim që Prokuroria t’i nxjerrë fundin të dy Babaleve, ndërkohë që puna për Paketën Antishpifje vazhdon”, ishin fjalët e Ramës.
Në gjykimin e kryeministrit, polic Nuhu që pretendon se është kërcënuar me pistoletë në kokë në prezencë të deputetit Balla, gënjen. Rama thotë se ata që lëshojnë akuzën, duhet dhe ta provojnë atë.
