Ditën e somte është zhvilluar mbledhja e radhës e Këshillit Politik. Pas kësaj mbledhjeje, përfaqësuesit e maxhorancës dhe opozitës kanë treguar se nuk është arritur akoma një konsensus i plotë.
Bëhet e ditur se pika ku kanë ngecur diskutimet është përdorimi i teknologjisë në zgjedhje, pasi nga opozita kërkohet që teknologjia të shtrihet në të gjithë vendin.
Nga ana tjetër, maxhoranca shprehet se duhet bërë pjesë pjesë siç është dhe rekomandimi i ODIHR.
Ndërkohë maxhoranca kërkon që komisionerët e votimeve të zgjidhen nga administrata shtetërore, ndërsa opozita kërkon një formulë mikse, ku edhe partitë të kenë vëzhguesit e tyre.
Në mbledhjen e Këshillit Politik të Reformës Zgjedhore, që u zhvillua pak ditë më parë palët u dakordësuan për periudhën zgjedhore nga 3 muaj, në 1 të vetëm.
Po kështu kanë rënë dakord për periudhën e votimit, ose në pranverë ose në vjeshtë dhe pati dakordësi edhe për kuotat gjinore. Palët janë zotuar që Reforma Zgjedhore do të përfundojë deri më 31 maj.
