Subscribe
Javën e ardhshme, parlamenti do të votojë kërkesën e Partisë Demokratike për shkarkimin e kryetares së kuvendit, Lindita Nikolla.
Këshilli i Legjislacionit ka vendosur t’i kalojë për shqyrtim seancës plenare dy raporte, atë të mazhorancës e cila është pozicionuar kundër shkarkimit të kryetares Nikolla, pasi sipas socialistëve ajo nuk ka kryer asnjë shkelje dhe raportin e opozitës, e cila gjykon se Lindita Nikolla ka shkelur kushtetutën dhe rregulloren, pasi u ka mohuar të drejtën e fjalës deputetëve të opozitës në dy seancat e kaluara.
Vetë demokratët nuk e lexuan raportin në mbledhjen e këshillit, pasi deputeti demokrat që e kishte hartuar atë, Gazment Bardhi, ishte përjashtuar.
DHURATA CUPI
DEPUTETE, PD
“Do të ndjekim të gjitha procedurat e vijuara më tej”
Por në këtë betejë të opozitës, rezultati është i qartë për të gjithë. Përballë një mazhorance që ka sot 78 deputetë, opozita nuk i ka votat për ta shkarkuar Lindita Nikollën nga posti i kryetares së kuvendit. Kështu që reagimi i tyre do të jetë protesta.
SAIMIR KORESHI
DEPUTET, PD
“Ky është një maskaradë që bëjnë, por ndoshta përgjigjen e marrin nesër.”
Për herë të parë në protestën e thirrur nga Sali Berisha, do të marrin pjesë të gjithë deputetët demokratë me përjashtim të Lulzim Bashës dhe Enkelejd Alibeajt.
