Kur kanë kaluar 5 ditë nga shtrimi në spital e avokatit Sokol Mëngjesi, gjendja shëndetësore e tij është e stabilizuar.
Ditën e sotme i është bërë një skaner dhe burime nga spitali i Traumës bëjnë me dije se sipas skanerit gjendja është e stabilizuar.
Pas 5 ditësh, sot mjekët kanë nisur edhe uljen e medikamenteve që e mbajnë në gjumë, për të nisur tentativat për ta zgjuar nga koma, e cila është një proces që zgjat në kohë.
Për këtë arsye është vendosur nga ana e mjekëve që avokati Sokol Mëngjesi të qëndrojë në intubim. Nga skaneri është vënë re një ulje e vogël e edemës.
AUTORËT E DYSHUAR TË SULMIT
DRITAN NANO, 58 VJEÇ NGA TIRANA Organizatori sulmit- I ndaluar me iniciativë, vjehrri i autorit kryesor të sulmit
DORIAN ALIA, 32 VJEÇ NGA TIRANA Dhunuesi – U vetëdorëzua pasditen e 29 majit, dhëndri i Nanos, dyshohet se bashkoi grupin për të realizuar planin
ELTON KASAJ, 33 VJEÇ NGA TIRANA Autor sulmi – i shpallur në kërkim DRIVALD ALIA, 21 VJEÇ NGA TIRANA Autor sulmi – i shpallur në kërkim
ROMARIO TABAKU, 26 VJEÇ NGA TIRANA i pranishëm në vendin e ngjarjes, largoi autorët me makinë – i shpallur në kërkim
NGJARJA
Avokat Sokol Mëngjesi u dhunua më 29 maj, në zonën e ish-Bllokut në Tiranë vetëm pak minuta pasi kishte lënë djalin e vogël në kopsht.
Në pamjet që edhe u publikuan në media, u shfaqen 4 persona, të cilët e dhunuan avokatin.
Për ngjarjen, dy persona janë arrestuar, konkretisht porositësi, Dritan Nano dhe njëri prej agresorëve, Dorian Alia. Ky i fundit ka pranuar se porositës i sulmit është Dritan Nano.
I riu ka pranuar se dhuna ka ardhur si paralajmërim që avokati 45-vjeçar të tërhiqej nga padia kundër Nanos për të marrë çka i takonte në pronën e fituar me gjyq te kullat e Liqenit.
Nga ana tjetër, Dritan Nano ka mohuar të jetë porositës i ngjarjes duke mos pranuar të bashkëpunojë me hetuesit, edhe pse këta të fundit janë të bindur që ai është organizatori kryesor.
Për këta dy persona, që janë vjehrri dhe dhëndi, gjykata ka caktuar masën e sigurisë arrest me burg.
HETIMET DHE VERIFIKIMET
Policia e shtetit bën me dije se personat e përfshirë në dhunën brutale ndaj avokatit nuk janë eksponentë të krimit në vend. Ata rezultojnë të padënuar më parë ndërkohë që akti në të cilin janë përfshirë tashmë i vë përballë një akuzë shumë të rëndë, si atë të vrasjes së funksionarëve të lartë publikë e mbetur në tentativë.
Edhe pse njëri prej autorëve të sulmit, i cili dyshohet se i mori tre djemtë e tjerë me vetë për të krijuar idenë e grupit, ka mohuar të ketë pas qëllim ta dëmtonte shënjestrën por t`i kërkonte që të tërhiqej nga kërkesa për marrjen e pronës për të cilën kishte firmosur më herët edhe vetë porositësi dhe organizatori u dhunës ndaj Sokol Mëngjesit.
Policia dyshon se tre të rinjtë që janë në kërkim mund të kenë dalë jashtë vendit dhe mund të jenë përdorur pikat kufitare me Kosovën për arratisjen e tyre, ndonëse tashmë ata janë të kërkuar. Edhe pse u hodh shifra prej 20 mijë eurosh nga ana e policisë së Tiranës, për këdo që do të jepte informacion të saktë në lidhje me vendndodhjen e tyre, ende nuk ka asnjë gjurmë dhe madje policia nuk ka mundur të fiksojë asnjë gjurmë në sistemin TIMS, çka ka bërë të mundur të ushtrojnë kontrolle në disa zona të vendit. janë zbuluar lidhjet familjare të të kërkuarve dhe policia po ushtron kontrolle ndonëse pa ndonjë informacion konkret të vendstrehimit të tyre.
Tashmë pritet që avokati të dalë nga intubimi dhe mbase atëherë do mund të flasë në lidhje me rrethanat dhe bisedën e fundit që ka pas para rreth një muaji me Dritan Nanon. Ndërkohë janë sekuestruar të gjitha kamerat në vendin e sulmit, janë identifikuar dhe do të merren dëshmitë e disa prindërve të cilët gjendeshin në vendin e ngjarjes për të njëjtën arsye që gjendej edhe Sokol Mëngjesi, në afërsi të kopshtit të fëmijëve, po ashtu edhe familjarët e të rinjve që morën pjesën në aktin kriminal.
