Akuzave të Partisë Demokratike për zhvillimin e ashtuquajturve tendera sekretë për pajisje mjekësore nga Ministria e Shëndetësisë dhe ushqimeve nga Ministria e Mbrojtjes, për disa prej të cilave SPAK ka nisur hetimet, kryeministri Edi Rama i qëndroi të njëjtës deklaratë: se nuk është zhvilluar asnjë procedurë e fshehtë tenderimi në funksion të përballimit të kërkesave të lindura nga pandemia.
Një ditë pasi Prokurori i Përgjithshëm Olsian Çela shprehu shqetësimin se në katër qarqe të vendit është vënë re një rritje e kanabisit, kreu i qeverisë tha se situata kundër kultivimit të bimës narkotike është e konsoliduar. Arsye kjo sipas Edi Ramës, që Shqipëria brenda këtij mandati do ta shfrytëzojë bimën narkotike për qëllime mjekësore.
Një vit para zgjedhjeve parlamentare, Edi Rama e përjashtoi mundësinë e krijimit të një koalicioni me Ilir Metën dhe krijimin e një qeverie kujdestare, kërkesë kjo e opozitës jashtë parlamentit për arritjen e një marrëveshje për reformën zgjedhore.
Akuzave nga brenda partisë së tij, nga ish-ministri i jashtëm Ditmir Bushati për shkëputjen e qeverisë ndaj oligarkëve, Rama tha se të tillë nuk ka në Shqipëri.
Pas kalimit të truallit të Teatrit Kombëtar në pronësi të Bashkisë Tiranë dhe reagimit kundër shembjes nga Presidenti i Republikës Ilir Meta, Rama është i mezi pritur në shembjen e tij.
Duke iu referuar situatës së pandemisë kryeministri tha se do po bëhet gati garancia e dytë sovrane për prodhuesit, fasoneritë dhe turizmin, ndërkohë që për këtë të fundit nuk ka ende një plan se si do të hapë dhe do të zhvillohet ai.
