Roman Goriljk sot duket si një skelet. Brinjët dhe klavikulat i dalin jashtë, barku është i zhytur, nyjet e shpatullave dhe ijeve i duken qartë nën lëkurën e zbehtë.
Hollësia ekstreme e Goriljkos duket se është rezultat i dy viteve që ai kaloi në robërinë ruse. Një ish-roje e pikës së kontrollit në termocentralin bërthamor të Çernobilit në Ukrainën veriore u arrestua nga trupat ruse në mars 2022, menjëherë pasi Moska filloi luftën.
Të premten, më 31 maj, ai u lirua përfundimisht, së bashku me 74 ukrainas të tjerë të shkëmbyer me 75 robër lufte rusë.
Të mërkurën, më 5 qershor, autoritetet ukrainase publikuan disa foto të Goryljkos, 40 vjeç, për të treguar pasojat nga robëria ruse, raporton CNN.
“Gjendja e të burgosurve të luftës ukrainas shkakton tmerr dhe lidhet me faqet më të errëta të historisë njerëzore – kampet naziste të përqendrimit të vdekjes”, njoftoi në Telegram Shtabi Koordinues për Trajtimin e të Burgosurve të Luftës, një organ i qeverisë ukrainase.
Këshilltari i presidentit ukrainas, Mihajlo Podoljak, tha se të burgosurit u kthyen në Ukrainë në gjendje të tmerrshme.
